Read NQAARIIT NE ROOG O baawaare xe 11 Bible Online

O baawaare xe 11 - NQAARIIT NE ROOG bible

O baawaare xe 11

¹Lulti ñaamel of kaltaa poofi ke, yaam a miñ miñ xan o daawatinin.[4]

²Xaaji o jeg of no fo mbiñ ɓetuu ƭik mbaat sax no fo ɓetuu tadik, yaam andiro taamaala kum na nqewkaa took lanq ke.

³A eel ake a mayangaa fa foofi, ta deɓ, too ndaxar a yenangaa, ta ref farna fo ɓemb-roog o ñamaak mbaat no janoon, me ta yenna a yoqaa.

⁴Oxuu na fuudaa nqeñ ne, duufkee, too oxuu haanna na eel ake, saxadkee.

⁵Ne andteeroona a ƭat ale no nqeñ ne, ne’atiim ne o kiin a ferooraa no fud no tew oxe saqna tig, neen andteero calel ke Roog, ten fee na fi’aa fop.

⁶Ten taxu duufi ax of nqes teel, too baa xa ƥay of a ƥutnoox boo yaa Roog a yaarkaa, yaam andiro ke na ñaaƴkaa, kene mbaat kaana, mbaat ƭik ke fop a ñaaƴ.

⁷Ndaw ne a qoolaand ale a felitna, too ndaw ne o ñoowaa a felitna!

⁸O kiin a ñoowangaa xa kiid xa mayu sax, fat a felakinoox na den fop, too a wetandoox ee a pe a peƭaru ke na moƴkaa o may. Fop ke na xewaa kasaara yoo.

⁹Wo o ndeɓandoong onqe, felakinooxi no ndeƥandoong of. Fat xeeñ of a ɗaay no njaaƈ of. Reefi ke xeeñ of a bugna fo ke a kid of a yuxmaa, ndaa fat o yeg fo and ee no keene fop xan Roog a hate’ong.

¹⁰Sambrandi xeeñ of fa naqad too goƭatirand cer of fo ke na ɓekan coono, yaam ndeƥandoong kaa faafaa nen mbeet.