Read NQAARIIT NE ROOG O baawaare xe 12 Bible Online

O baawaare xe 12 - NQAARIIT NE ROOG bible

O baawaare xe 12

¹Wetandooxi o Saasak of yaa fo ndeƥandoong of, boo ñaal taamaala ke a ngelko fo ngaraa, soo xa kiid axe mbeleeroonga a mbadiid,

²boo njeeƈ ne fo a qoolaand ale, a qoor ale fo xa qoor axe a ngelko fo niifaaraa na wo, soo a eel ake a nomtooxiid ndak fo ndak cinj a teƥ ale.

³A koom, yeeyetax[5] we no mbind ne xan a ngoɓaa, poŋkil ke a ñakat doole, rew we mbarna o un a ndam tet, yaam ne da mayateerna, we na mbootnooraa na xa palangteer axe a muuroox,

⁴begax ƭik ke no don-maax ole mbarna no mbed ne a mbegoox, soo fangax le na ƥil a unir ake a wañoox, yaa o yokwandooraa fo tiiƭ ke, soo xa ñuxur axe no giigim rew we fop a nqonat,

⁵yaa a ñaang ake a saɗareel, o ñaaƴ na ƭat ale a wooraƭarat, piɗ tan a muurat ndaxar ne, soƈ a ɗooqooxataa, fop a maasat ƴam, yaam o kiin oxe kaa xaadaa no ngenand um ne na refkaa boo faw, soo loolool we a mbaafraa no mbed ne.

⁶Wetaandooxi o Saasak of yaa fo ndeƥandoong of, boo o ƥaak xaaliis ole a helko fo ɗegaa, o ndog wurus onqe a ɓaƈtoox, boo o nqaw onqe a geftaa no ƴeewand ole, soo a poli le a gef, a yen na ngas ale,

⁷boo cer ke a ngelko fo nomtooxaa no lanq ke da ngat’ina, soo o ñoow ole a nomtoox maa Roog fee ci’it’uuna.

⁸Kasaara fee no kasaara ke! O Baawaare xe kaa tee: Fop kasaara yoo!

⁹O Baawaare xe reeƭee o cegu yiif soom, a day teen, ndaa a aqatina xeet fee o and. A ɗeetaqina, a horoox soo a leem xa peƭit xa mayu.

¹⁰O Baawaare xe a ɗofta o jeg xa ƭelem xa saƭku, soo a bind ndigil mbooru.

¹¹Fa lay no jegu yiif we kaa nand nen o loq o xurir naak, xa peƭit axaa mbokateena a nand nen xa teng xa taaƴe. Ci’it Roog oo fee refna o Kaynaak o leng kut oxe.

¹²O ƥees, ke yoqna refu o xotit teen a cangin. A safe podne mbaageena o mbind njegee hap, too a cang a mayu kaa xijlaa cer.

¹³Ke o kiin a warna o xotit no ke layeena refu yee: Saɗari a Roog too gay kebil um, yaam keene doŋ refu ngiin.

¹⁴No ndigil xan Roog a hate a pi aluu refna, boo no ke ɗasna sax, ta ref paax mbaat paaxeer.