Read NQAARIIT NE ROOG O baawaare xe 2 Bible Online

O baawaare xe 2 - NQAARIIT NE ROOG bible

O baawaare xe 2

¹Layaam taa kam es ee: «Acanga um ɗeetloox ke refna o ɗaay, ñim o mbelakinax!» Kaa koy, keene itam kasaara yoo.

²Layaam no cal ke yee: «Cegee xoox oo!», soo o ɗaay ole, um layin ee: «Xar a ɗaxu?»

³Fosooxaam o ɓoxot cer es na yer biiñ, too sambirkiim fo o jeg-yiif, saaƭoox no ƭooɗofir boo yaa um ga’kaa ndax a faaxa xa ƥiy Aadama a mbesooraa neene took lanq ke no ndik onqe da ndanqeena no ñoow ole.

⁴Fadnaam calel maak. Maxnaam pind, jimb taxar biiñ,

⁵fi a ƭing fo xa qol taxar soo jimb teen taxar tiirim kuu ndefna.

⁶Jalnaam palka, ndax um soorit poofi ke den suungaan taxar teɓ ƥor keene.

⁷Waaƭaam faɗ goor fo rew, too jegaam waa ndimteena no mbind es. Jegaam xa siir fo a ked bo ta dey sik, kupu ke we adooxaxama Yeerusaleem fop a njeg’ina.

⁸Geeranaam a xoox es xaaliis fa wurus, ta hat no kalal ke no maad we fo na xa cegel axe ƥoxotoox’ina na mi. Waaƭaam giigim goor fo rew too jegaam ke na ɗaaynooraa o koor, ta ref o tew, boo no rew fagkatar sax.

⁹Refataam o kiin o maak soo hupat fop we adooxaxama Yeerusaleem, ndaa no keene fop sambir’iim fo o jeg-yiif es.

¹⁰Kuu a kid es a yuxum’ina rek, xañtooginum a den, too xañiim xeeñ es o ɗaay o leng. Xeeñ es kaa felakinooxoogu no ke calel es a mbatna fop, too keene reeƭu a las ale daawtuuma na ŋus-ŋus es.

¹¹Cinj kaaga, xalaataam a paax ke xa ƥay es a njalna fop fa coono fee gomuuma ndax um fadin a den, soo um ga ee fop kasaara yoo fo a ƥaaƈ a ƥor. Dara teen ɗaxee tus took lanq ke.

¹²Ɗoftaam o ɗeetaqin o jeg-yiif fo o ƥodaxel fo ƭof. Ndi xar o koor oxe na rondandkaa o maad oxe a fi’kaa? Ke fi’eena boo a ƴut doŋ!

¹³Ga’aam ee o jeg-yiif ole hupu o njiriiñ ƭof ne, ne a qoolaand ale a hupitna o niɓaan ole o njiriiñ.

¹⁴Oxe jegna yiif kaa ɗeetaa me ta dakaa, fanxoy fee mat a ñaaƴaa kam o niɓaan ole. Yaag oo toox de, ga’aam ee muj fa leng kut fee na cungaa a den, den ɗik fop.

¹⁵Layaam taa kam es ee: «Muj es xan a nand fa fee na fanxoy fee. Xar a ɗaxu boog um moƴin o jeg yiif?» Maaga, ga’aam ee keene itam kasaara yoo.

¹⁶Oxe jegna yiif waaskee meen betandoor mbaafkeer kupu a fanxoy fee. A miñ miñ xan a mbeectel, den ɗik fop. O cegu yiif oxe kaa xonaa nen a fanxoy fee.

¹⁷Sibaam boog o ñoow ole, yaam ga’aam ee ke na fi’eel ɗuga njeeƈ ne feliraam tus, feek fop kasaara yoo fo a ƥaaƈ a ƥor.

¹⁸Sibaam ke ŋus-ŋusnuuma fop ɗuga njeeƈ ne, feek kaam warin o xaƴan oxe na rondandkaxam, ta muudoorin,

¹⁹too an andu, ndax o cegu yiif a refkaa mbaat fanxoy? Yaag oo toox de, o ten na hame’kaa ke ŋus-ŋusnuuma fop ɗuga njeeƈ ne, a jiriiñoorit teen o jeg-yiif es! Keene kasaara a refahinu.

²⁰Maaga, pafataam o gooy no ke ŋus-ŋusnuuma fop ɗuga njeeƈ ne.

²¹O kiin oxaay a ŋus-ŋusna fo o and fo o jeg-yiif fo ngoora boo a ƴut, soo ke ta jalna a ɓoxotel oxaa xijeerna teen dara. Keene kasaara a refahinu fo cageer.

²²Ndi yaaga boog, fop ke o kiin oxe a ŋus-ŋusnaa fo ke ta ɗoftaa took lanq ke xar a ƭaxu?

²³A pe um fop coono ƥor oo, ke fiduuna a gal’andan, too xeeñ um jegee a ƥutnax boo no yeng ole sax. Keene kasaara a refahinu.

²⁴Ke moƴna no kiin refu soom ta ñaamaa, a yeraa, soo a muudoor ke ta ŋus-ŋusinna, ndaa ga’aam ee keene itam no ɓay Roog a hataa.

²⁵Ndi yaaga boog, an waagu o ñaam, a felakinoox, Roog a ci’angiran o ten?[1]

²⁶Roog kaa ci’aa oxe feluuna o jeg-yiif, o and fo o ɗaay, o paabakaad oxe mat, ta riñan no gisaatooxanaa, a kolkandanaa oxe felna a Roog. Keene kasaara a refahinu fo a ƥaaƈ a ƥor.