Read NQAARIIT NE ROOG O baawaare xe 3 Bible Online

O baawaare xe 3 - NQAARIIT NE ROOG bible

O baawaare xe 3

¹Fop hap a jegu, tig oo tig hap um a jegu ɗuga asamaan.

²A jega hap o rimel fo hap fa nqon, hap a cimb fo hap o fuur njimb ne,

³hap o war fo hap o wodand, hap o bayit fo hap o max,

⁴hap o lool fo hap o jaloox, hap o ɗomatoox fo hap o fecoox,

⁵hap o deɓ a ƭak[2] fo hap o gis a den, hap mbarakoor fo hap saytoor,

⁶hap o waaƭ fo hap o mo’iɗ, hap o geek fo hap o deɓ,

⁷hap o xuuy fo hap o ɗiis, hap o tiim fo hap o lay,

⁸hap o fex fo hap o sib, hap xire fo hap jam.

⁹Ndi o njiriiñ onqum o kiin oxe a xottaa no ke ta jalaa?

¹⁰Ga’aam calel pogreer ke Roog a gadinna xa ƥiy Aadama ndax da mbadin a den.

¹¹Kaa fi’aa tig kuu refna na hap um, ta mos bo. A ɓeka no yiif no kiin sax ta and ee o ñoow ole dayee na fa nqon, ndaa taxee o kiin oxe a waag o and ke Roog a fi’aa, a xotit no mberaand naa boo no muukandoong naa.

¹²Ga’aam ee ke moƴna no kiin refu ta felakinooxaa, a feland o ñoow um.

¹³Kaa koy, o kiin a naagangaa ñaamaa yeraa soo a muudoor ke ta ŋus-ŋusinna, ci’it Roog oo.

¹⁴Ga’aam ee fop ke Roog a fi’aa kaa refaa boo kili. Jegee dara kaa wareena ɓaat teen mbaat ta wañel teen. Roog kaa fi’taa neene, ndax ta saɗarel.

¹⁵Ke jegna a mosa jeg, too ke na jegkaa a jega boo a ƴut. Roog kaa nomtiidaa ke faafna.

¹⁶Keeke ga’ahinum took lanq ke: Cageer na maadooxaa me a ƭat a jegeena, soo me o cofel a jegeena njofaƭar a gen maaga.

¹⁷Layaam taa kam es ee: «Xan Roog a hate o cofu xe fo o soxodu xe, yaam tig oo tig fo a pi aluu refna hap a njegu.»

¹⁸Layahinaam taa kam es no kaa jofna na xa ƥiy Aadama yee: «Roog kaa ɗeetlooxaa a den, ndax ta lal a den ee ngupee muumeen ke o njiriiñ,

¹⁹yaam muj no wiin we fa fee no muumeen ke njegee njektir. O leng oxe kaa xonaa nen o lakas oxe, den fop haaƭ leng le a saqu, too o kiin hupee a muumeen, fop kasaara yoo.»

²⁰Fop o mbiñ o leng kut onqe a njofaa. Fop no lanq ke a ngatu, too fop no lanq ke a nomtooxaa.

²¹An andu, ndax o laaw ole no kiin oxe took a jofaa, soo ole no muumeen ke mat a fudooxaa a lanq.

²²Maaga, ga’aam ee jegee dara kaa moƴna no kiin oxe, a refangee o felakinooxaa no ke calel um a mbatna. Keene refu a las um. Ndi an na nomtiidkan, ndax ta ga ke na xewkaa a cinj um?