Read NQAARIIT NE ROOG O baawaare xe 4 Bible Online

O baawaare xe 4 - NQAARIIT NE ROOG bible

O baawaare xe 4

¹Cinj kaaga, horooxaam xa qos ñagadil axuu ndefna took lanq ke. We na ñagadileel owe nqaarnaa xa kooniit, too jegee o leng oxaa yaalna a den. Sañ-sañ fee xey fo ñaañagadil we den, ten taxu njegee yaayaal.

²Maaga, layaam ee we nqonna boo a ƈut moƴu ƭaay we na ñoowaa,

³soo we ndimafulaandeena a moƴ o ƭaay a den fop, yaam nga’afulee njofaƭar ne na fi’eel took lanq ke.

⁴Ga’aam ee ŋus-ŋus fuu refna fo calel ñaaƴu kuu ndefna ciis rek garu fo ten. Keene kaa refahin kasaara fo a ƥaaƈ a ƥor.

⁵Fanxoy fee na kongomaa xa ƥay um, xoox um a saŋkaa.

⁶O ɓay o leng o mayu laa yoonitna a ñootnax moƴu ƥay ƭik mayu muut kaa yoonitna coono fo a ƥaaƈ a ƥor.

⁷Ga’ahinaam kasaara fa lakas took lanq ke:

⁸O kiin oxey a yoq koƭong, refee fo o lakas, jegee o ƥiy mbaat o pog oxaa matuuna, ndaa yaqanee calel um njegee ngakand, too a kid um mbaagee ndeyƭoox na halal. Naagee laamtooxaa yee: «Ndi an um jalanaa boog soo xañtaa a xoox es baneex?» Keene kasaara a refahinu fo calel ƭaxee tig.

⁹Ndef ɗik moƴu yee o ref koƭong, yaam mbef no ɗik hupu mbef no leng.

¹⁰A yenangaa, o leng oxe xan a in o yoon um, ndaa o njakad oo no xe refna ten doŋ soo a yen. Jegee oxaa inuuna.

¹¹Neene itam, ɗik a mbondooxangaa, a naanga o sumniraa, ndaa oxe refna ten doŋ, nam a sumaanitkeel?

¹²O kiin o leng kut, o pañ a yooɓaan o harin, ndaa a ndefangaa ɗik, a mbaaga o nqox oxeene sup, too o ƥaak ole gomateena yooɓaand o ɗeg.

¹³O fes o roolu too a jeg yiif moƴu o maad o nogoy oxaa fanxoyna boo jaɓatee o asel,

¹⁴yaam ta sutoor kaso sax mbaat ta rimtel ndool a waaga moof boo a ref o maad.

¹⁵Ga’aam fop we na ndetaa ngaraa took lanq ke, da mbar fo o fes ole geenoox’ina no rondand o maad oxe.

¹⁶A yaj ale na xeet feene fop ta adooxan’ina waagaand o lim. Yaag oo toox de, suk ke na ngaraa moƴkee sawar lool no ten. Keene kasaara a refahinu fo a ƥaaƈ a ƥor.

¹⁷Fat o wootoox, yaa o retaa no Mbind Roog ne, too gari ndax o nan-giloox, ndaa baa ref ndax o ɓoxot sadax fee no panxoy ke, yaam njaɓee yee kaa mbi’aa paaxeer.