Read NQAARIIT NE ROOG O baawaare xe 5 Bible Online

O baawaare xe 5 - NQAARIIT NE ROOG bible

O baawaare xe 5

¹Ba o ñofandoox fa lay of, too baa xeeñ of a tay o fi a tegit mbaambir Roog, yaam Roog oxaay na asamaan, soo o ref took lanq ke. Baa fa lay of a jaak boog,

²yaam ne xa ƭaaɗ axe a ngattaa na qalam a pagkatar ake, neene fa lay fa mayu a rimtaa ƭooɗofir.

³O regoorangaa fa Roog, fadneen no ñofu, yaam mbanxoy felee a Roog. Fadni boog ke regtoona.

⁴Ñak o regit moƴu yee o fi a tegit too fadnino.

⁵Ba o ci o don of ta bakaadnoorong, too ba lay mbaambir no tuleer Roog oxe[3] yee refee fo diy. Xar taxu Roog a fuuxkoogu na fa lay of soo a yaq ke jaloona?

⁶Fa lay fa njegee hap kaa ref kasaara nen xa ƭaaɗ xa pagkatar. Ten taxu boog saɗari a Roog.

⁷Ba o jaaxiɗ, yaa ga’oona o ndool onqe a ñagadileel mbaat a ƭat fo o cofel a naɗeel kam saax le, yaam kelfa fuu ga’oona no maat ne, oxaa hupuuna na singan, soo den ɗik fop, oxaa garitna a den took a hulaa a den.

⁸Ke moƴna no saax refu yee a koƥ ale na xooxeel a jeg o maad oxaa na xoxtan.

⁹Oxe fexna xaaliis waagiran o deyƭoox, too oxe fexna halal deyƭooxkee muk no ke ta rimaa. Keene kasaara a refahinu.

¹⁰Nuu o jeg ole a ɓaatooraa, we na ñaaman a moƴ o mayaa itam. O njiriiñ onqum o yaal um a xottaa teen, a refangee o fuudaa halal um doŋ?

¹¹O caajal oxe de, kaa ɗaanaa boo a fal o saq, ta jeg o ndik mbaat mayu kaa ta ñaamaa mbodu, ndaa o yaal halal oxe mat, waagee sag a ngid yaam halal fa mayu um.

¹²A jegahina o njakad onqaa ga’uuma took lanq ke: Ta ref halal fee na ɓekaa o yaal um na taamaala.

¹³A ñaka halal feene no tig paaxeer boo o ƥiy o ngoor onqe ta jeg’ina sax yoqɗatee o ndus.

¹⁴Ne ta rimteena no fud ya um, neene a nomtoortu o ƥor, ne ta garit’ina garit. Ɓislooxee dara no ke ta ŋus-ŋusinna.

¹⁵Kene o njakad o yuɗnooxu a refahinu: Ne o kiin a garitna garit a nomtoorkaa deŋ. Yaaga koy o njiriiñ onqum a xottu teen? A ŋus-ŋusna na xa ƥaaƈ.

¹⁶Kaa ñoowaa xa yeng um kam o niɓaan, a qalam um fo coono um a naang gañ, kam um a fag tak.

¹⁷Mi de neeke ga’tanum: Ke moƴna no kiin oxe refu ta ñaamaa, a yeraa soo a muudoor ke ta onjna took lanq ke, no ndik onqe Roog a danquuna no ñoow ole, yaam keene soom a jegu teen.

¹⁸Kaa sax o kiin oxuu Roog a lasna halal fo o jeg, a ci’in ta muudoorin, a xotaa teen a las um soo a felakinooxaa no onj um, kaaga ci’it Roog oo.

¹⁹Neene, Roog kaa mayƭandaa xeeñ no kiin fo o ɗaay boo xalamkee ne o ñoow um a raƥitna.