Read NQAARIIT NE ROOG O baawaare xe 6 Bible Online

O baawaare xe 6 - NQAARIIT NE ROOG bible

O baawaare xe 6

¹A jegahina o njakad onqaa ga’uuma took lanq ke, ta gal’andaa wiin we.

²A jega o kiin oxaa Roog a ci’na halal fo o jeg fo o niwel boo ñakee dara no ke ta bugna fop. Kaa koy, Roog ci’iran ta muudoorin, ndaa o lakas na ñoowitkan. Keene kasaara yoo fo o njakad o maak.

³O koor a jeg’angaa xa ƥiy teemeed soo a doon teen a xuuɗ-o-ñis, kuu xa yeng axe no ñoow um a mayna may fop oo, too jegee ne feluuna mbaat o gasanqol o faax, kaam ee o fud o watu moƴun o ɗaay.

⁴O fud o watu koy kaa ref kasaara. Kaa nomtooxaa kam o niɓaan ole, too o leng andkee ke ta refkoogna.

⁵Ga’ee njeeƈ ne too andee dara na adna fee. Ten moƴu o ñootnoox oxeene.

⁶Ñoow xa kiid cuni ƭik sax too jegiro ne feloonga, xar a ɗaxu? Ndax fop sagee o mbiñ o leng kut?

⁷Ke o kiin a ŋus-ŋusnaa fop o fud um taxun. Yaag oo toox de taxee ta waag o deyƭoox.

⁸Xar o cegu yiif oxe a hupɗitu a fanxoy fee? Xar a jiriiñu o ndool onqe ta fesooraa ne warna na adna fee?

⁹Deyƭoor ke jegoona moƴu yee a yuxum a adnong, yaam keene kasaara a refahinu fo a ƥaaƈ a ƥor.

¹⁰Ke jegna a xoyooge gon um yaaga boo a ƴut, too ke o kiin a refna a ande: Waagee doonatir fo xe Hupuuna doole.

¹¹Fa lay a mayangaa rek, kasaara a gar. Xar o kiin a xotitkaa teen?

¹²An andu boog ke faaxna no kiin oxe no ñoow o raƥu jegee njiriiñ ole ten, na faafaa nen yook? Ndi an waagun o yegin ke na xewkaa a cinj um took lanq ke?