Read NQAARIIT NE ROOG O baawaare xe 7 Bible Online

O baawaare xe 7 - NQAARIIT NE ROOG bible

O baawaare xe 7

¹O jeg gon moƴu ƭuumwel kaa maginna njigand, soo bes fa nqon a moƴ bes o rimel.

²Ret no mbind naa na nqaaraandaa moƴu o ret no naa na mbumbaayaa, yaam fa nqon refu muj no kiin oo kiin, too oxuu na ñoowaa a waraan o ɓekit yiif.

³Naqad moƴu cal, yaam a waaga feƭarin a tagid, ndaa kaa saƭkandaa o kiin.

⁴O cegu yiif oxe kaa xalaataa fa nqon um, fanxoy fee mat a xalaataa mbumbaay doŋ.

⁵Nan-giloox o soqangol no cegu yiif oxe moƴu o nan-gilooxaa a tagas ake no panxoy ke.

⁶Ne xa saaŋaan a mbeɗditaa yoora o xuɗoox, neen cal ke na fanxoy fee a nandu. Keene kasaara a refahinu.

⁷Ke jegteena na ƭat a qeleer a waaga ɗofnoor o cegu yiif oxe sax, ker ke a mbuulandaa yiif.

⁸O ƴutand tig moƴu o sogan o fer, jeg o muñ a moƴ a magnandax.

⁹Ba o yooɓ o fuux, yaam o mat-xeeñ panxoy ke njegun.

¹⁰Ba o lay ee: «Xar taxu camaane ke yaaga a moƴ’u mbel fee xaye?» yaam o laamtoox keene o ñak-yiif oo.

¹¹O jeg-yiif ole kaa faaxit nen lam, a hup o njiriiñ no we na ñoowaa took lanq ke fop.

¹²Ne xaaliis a sutura’taa, neene o jeg-yiif a sutura’taa, ndaa ke o jeg-yiif ole a huptuuna o njiriiñ refu yee kaa saytooxaa o ñis no we njeguuna.

¹³Ɗeetangi calel ke Roog! An waagu naƭit ke ta naɗna?

¹⁴Na bes fee no ɗaay ole, felakinooxi, soo na bes fee na naqad fee o xalaat. Roog kaa fi a den, den ɗik fop, too o kiin oxe andee dara no ke na dalkan.

¹⁵Ga’aam kuu refna no ñoow kasaara es: O cofu xe kaa saŋkooxaa, ke ta jofna fop oo, soo o soxodu xe a xuuɗ bo, ke ta soxodna fop oo.

¹⁶Ba o jof bo ta hup, too ba o lalit o jeg-yiif bo ta maam. Xar taxu o saŋiknooraa a xoox of?

¹⁷Ba o soxod bo ta baaƭ, too ba o ref fanxoy. Xar taxu o xonkaa, too hap of fadee?

¹⁸A faaxa, ndax o dam keene, too baa kaana a ɓostooxong. Oxe saɗarna a Roog kaa sutooxaa no keene fop.

¹⁹O jeg-yiif ole kaa saƭkandaa o cegu yiif oxe kupu wiin maak xarɓaxay na teeru fa leng.

²⁰A woora kañ ee jegee took lanq ke o kiin o cofu xaa na fi’aa paax doŋ too bakaadkee.

²¹Ba o nan-giloox ke na layeel fop, yaam ndik o nan surga of a salooxang.

²²Andaa a paax ee wo fa xoox of sax a caf a mayu salooxaa lakas we.

²³Ɗeetloortaam keene fop o jeg-yiif soo lay taa kam es ee: «Bugaam o jeg yiif.» Kaa koy, a goƭaxam lool.

²⁴Ke jegna kaa garit a in took, a xooɗ tigi. An waagun o and?

²⁵Maaga, soobooxaam fo ngiin es fop no jang, horoox soo ɓaal o jeg-yiif ole fo ke taxna tig oo tig a jeg, too ga’aam ee paaxeer o fanxoy oo, o ƥodaxel a ref ƭof.

²⁶Ga’aam kaa moƴna o feƭar fa nqon: ta ref o tew oxaa mbug um a refna mbog fo mbaal, soo xa ƥay axe a ndef ceen. Oxe felna a Roog kaa daɗan, o paabakaad oxe mat, ta naagin nuus.

²⁷O Baawaare xe a laya yee: Keeke refu ke ga’uuma, yaa um horooxaa tig oo tig, o leng o leng, ndax um and ke garna fo ten:

²⁸Ke waaƭuuma ga’inum. Kaa layel ee: «A ndeer wiin juni, ga’aam teen o koor o leng o cegu sedel, ndaa a ndeer no weene fop koy, ga’iim teen o tew o leng.»

²⁹Kaa koy, ke ga’uuma refu yee: Roog kaa sak wiin we da njof, ndaa den o mat kaa njafeñin tige.