Read NQAARIIT NE ROOG O baawaare xe 8 Bible Online

O baawaare xe 8 - NQAARIIT NE ROOG bible

O baawaare xe 8

¹An refu o cegu yiif tigi boo a waag o tekit tig oo tig ke? O jeg-yiif ole no kiin oxe kaa letnaa a tagid um, a watnaa a kiɓax ale refna teen.

²Nanani kebil no maad oxe yaam ke daaɓooxoona mbaambir Roog.

³Ba o teel o hod o maad oxe, too ba o ŋaj no tig pooreer, yaam o maad oxe kaa fi’aa kuu feluuna.

⁴Fa lay fee no maad oxe a jega sañ-sañ. An na laykan boog ee: «Xar o fi’aa kene?»

⁵Oxe na reefaa kebil um jegkee naa feƭaruuna, too o cegu yiif oxe a anda bes fa mosu fo ke refna a ƭat,

⁶yaam kuu refna hap a jegu fo a pi’ooƭ um, ndaa koy, wiin we a mbara ngadoox coono mayu.

⁷Andee ke na xewkaa fo ne ta xewitkaa, yaam o leng yegniran a den.

⁸O kiin oxe sañee o ñis um, too waagee lay bes fee ta xonkaa. Maafir neene jegee ndaɗand, too kañaan ne mucilkee teen o soxodu xe.

⁹Ga’aam keene fop, yaa um horooxaa ke na fi’eel took lanq ke fop na jamaane fee o kiin oxe a maadooxaa took o kend um ndax ta toroxandin.

¹⁰Maaga, ga’aam soxodu we a ƥiseel no poy den, a nqottel no mbiñ o tedu nqe, soo paaxeer ke da mbi’’ina fop a mbeectel kam teeru fee. Keene kasaara a refahinu.

¹¹Feek oxe fi’na paaxeer naagee xaweel ndak fo ndak, keene a naaga riñaa wiin we na pi a paaxeer.

¹²Yaag oo toox de, o paabakaad oxe a fi’angaa paaxeer a caf teemeed sax oo too yaqanee ta xuuɗ, mi andaam ee o ɗaay ole, we saɗarna a Roog a refanu, yaam a njega no ten caƭar.

¹³Kaa koy, o ɗaay ole refanee o soxodu xe, too xuuɗkee kupu yook ne, yaam jegee caƭar leng na Roog.

¹⁴A jegahina kasaara fene na xewaa took lanq ke: Ten refu yee a jega jofu waa muj den a jagna fo soxodu we, soo ta jeg soxodu waa muj den a jagna fo jofu we. Layahinaam ee keene kasaara yoo.

¹⁵Kañaam boog o ɗaay ole, yaam jegee dara lakas kaa moƴna no kiin oxe took lanq ke, a refangee ñaamaa, yeraa soo felakinooxaa. Keene refu a las um no ke ta ŋus-ŋusinna no ñoow ole Roog a danquuna took lanq ke.

¹⁶Ye ɗoftuuma o and o jeg-yiif ole soo horoox ke wiin we a mbi’aa took lanq ke, boo ta yaqan a den o sag a ngid, ñaal oo yeng oo,

¹⁷ga’aam ee o kiin oxe waagee o and calel ke Roog, fop ke na xewaa took lanq ke. Kuu ta ŋus-ŋusnaa fop oo, andkiran, too o cegu yiif oxe a foogangaa sax ee a anda, taxee ta andin.