Read NQAARIIT NE ROOG A kim ale na kim ake 1 Bible Online

A kim ale na kim ake 1 - NQAARIIT NE ROOG bible

A kim ale na kim ake 1

¹A kim ale moƴna fel, a fog na ke Salomo a ferna.

²[1] Fat o foontaam o don of, yaam mbug of moƴu biiñ.

³Sulooxel ke wo a mbela tuñ lool, gon of a nand nen ƭuumooxel kaa naangna sur. Ten taxu mboƥ ndoog ne fop a mbugong.

⁴Damaam o ɓay, i ƈufloox! Wo o maad es, ɓekaam na ndok of. Xam ref no ɗaay, felakinoox yaam wo, kañ mbug of ne moƴna biiñ, yaam o bugong a ƭat oo.

⁵Nuun roog we Yeerusaleem, ɓalgaam ɗok, ndaa mosaam nen ƭiif ke Kedaar, nen coor mosandir ke na ndok Salomo.

⁶Ba nu mbuudaam, yaam ne njeeƈ ne a doxaxama boo um ɓalig. Jamin es a mbuuxanaxam, a mbi’aam o yeeyetax a ƭing taxar biiñ ake den, too a ƭing ale jegooduuma yetooxinum.

⁷Wo fee buguuma no xeeñ es, feeñlaam me o gayaa ged of, me o koornan njoloor o mbuc. Xar taxu boog um muurooxkaa, joqooyooxaa, widang paam a ked ake no yoon of?

⁸Ey, wo fee moƴna mos no rew we, o andangiran, sutooxi reefan xa caf axe no ged le, too gay fo mbambe of paam xa taland axe no gaynaak we.

⁹Ey, wo fee buguuma, kaam nandandtang wajan[2] fee na humneel na sareet ale Firawon fee.

¹⁰Xa ƭek axe wo kaa mos bo ndeer xa libidoor axe, o cok of a xen a ndeer ceq ke.

¹¹Xam fi’anong kumooxel wurus kaa mosandteena xaaliis fa nqoolu.

¹²O maad es a letnooxa no njong um, naar fee mi a naag sur a qeeñaan um.

¹³Oxe buguuma kaa ref na mi nen o mbof miir onqaa na lipaa a ndeer ƭeen es,

¹⁴nen saq fudand laa waaƭteena na ƭing taxar biiñ ake En-Gedi.

¹⁵Wo soo mos, wo fee buguuma, kaam ee wo soo mos, a kid of a mosit nen a nuukuur.

¹⁶Wo soo mos, wo fee buguuma bug, wo soo bugel! Njong in kaa ref suuƴin xuƥu sap le,

¹⁷tabax in a ref taxar seedar, bomb le in a ref pilaawo.