Read NQAARIIT NE ROOG A kim ale na kim ake 2 Bible Online

A kim ale na kim ake 2 - NQAARIIT NE ROOG bible

A kim ale na kim ake 2

¹Kaam ref doŋ nen piɗ ke na xa saawit axe Saron, nen ngaaf-a-tooq ne na koƥ ale.

²Nen ngaaf-a-tooq kam takar-ñiig, neene oxe buguuma a nandu ndeer roog we.

³Nen ndaxar ndiirim ndeer taxar koor ke no suungaan le neene oxe buguuma bug a nandu ndeer mbes ke. Yaawaam o moof no yook um, too o rim um kaa fel no don es bo.

⁴A ɓekaxam maa i mbelakinooritna, too a lalaxam mbug um bo ta dey sik.

⁵Saƭakintaamoo xa kaf xa tim biiñ, ƭeettiidaamoo xa tim, yaam mbug ne kaa jiraam!

⁶Kaa hakandnaam o ɓay um o janoon, soo a ñamaak um a morgooxaam.

⁷Nuun roog we Yeerusaleem, mexe daaɓoortan pat ke fo caf ke na koƥ ale, ba nu yaqan a in nuɗir in, kaam ee ba nu ƭegin, too i mbugafuliran.

⁸O ñuxur no xe buguuma bug oo. O ten oo xeene na garaa, a foolaa took xa coong axe, a cir-cirnaa took a ñaang ake.

⁹Oxe buguuma bug kaa nandtaa mbat mbaat njaf ndeɓ. O ten oo xeene, a geenooxa laqa tabax ne in, a wootnoortaa no falangteer ole, a kid um a miric-miricnaa no tagar ne.

¹⁰Oxe buguuma bug a refa no layaa fa mi. Wo fee jaranaxama kuu refna, o mosu xe mi, inooxi gar!

¹¹Me ta refna ndiig ne a sutooxa, a teƥ a seeseek ake a simid, a ndet col.

¹²Piɗ ke a mbeeña kam saax le, waxtu a kim a fad, o ñuxur ole na qoɗoxoñ ale a nannoox kam saax le in.

¹³Ndun ne xe morolaa, soo taxar biiñ ke mbiɗna a naang sur a qeeñaan den. Wo fee jaranaxama kuu refna, o mosu xe mi, inooxi gar!

¹⁴A nuukuur es ale kam luf ne na ƥil ake, ɗasna me lunqooxna, lalaam mukit of, nannooraam o ñuxur of, yaam o ñuxur of kaa fel, soo mukit of a yaawnoox.

¹⁵A ƭing taxar biiñ ale mi aley fiɗaa. Ndamanyo a in boog xa ƥox-a-koƥ xa teɓ axe na nduudnaa a ƭing taxar biiñ ake.

¹⁶Mi jegu oxe buguuma bug, soo ta jegaam, ten fee na gayaa ged um ndeer kaaf-a-tooq ke.

¹⁷Boo yilmaan le a helko fo yenaa, soo yook ke yee mes, gatiidi, wo xe buguuma bug, ñofi gat took xa coong axe suleena qeeñe-xeeñe, nen mbat mbaat njaf ndeɓ.