Read NQAARIIT NE ROOG A kim ale na kim ake 3 Bible Online

A kim ale na kim ake 3 - NQAARIIT NE ROOG bible

A kim ale na kim ake 3

¹Took njong es, kam o yeng ole, waaƭaam oxe buguuma no xeeñ es. Waaƭaanum too ga’inum.

²Maaga, layaam taa kam es ee: «Xam inoox soo wid teeru fee bo ta xet, no ped ke fo no paayo ke, waaƭaa oxe buguuma no xeeñ es.» Waaƭaanum, ndaa ga’inum sen.

³Yeeyetax we na mbidaa teeru fee a nqeta fa mi, um laamit a den ee: «Ndax nu nga’ee oxe buguuma no xeeñ es?»

⁴Yaa um jolaa a den o ndik rek, ga’aam oxe buguuma no xeeñ es. Naagaanum nuus, fañatin o xaƴ, boo neen ɓekanum kam mbind ya es, me oxe rimaxama a genna.

⁵Nuun roog we Yeerusaleem, mexe daaɓoortan pat ke fo caf ke na koƥ ale, ba nu yaqan a in nuɗir in, kaam ee ba nu ƭegin, too i mbugafuliran.

⁶An oo xeene na inoortiidaa na koƥ-a-ƥor ale kam fo ut ole nen eel fo suun, a suloox miir fa cuuraay fo ƭuumooxel qeeñe-xeeñe kuu ndefna?

⁷Njong ne Salomo a meeɓteel oo, goor qarɓeen ɓetuu fa leng no xir say we Isra’el a ndeerin,

⁸fop a ƥonoox laƥ, a aqatoox xire, oxuu refna a saq laƥ no saax um yaam taamaala ke no yeng ole.

⁹Njong ne o maad Salomo a meeɓteel a teex ake Libaŋ a fi’te.

¹⁰A toodook ake, xaaliis a mbi’it’e, keƈnoor ke a ref wurus, paƴaas ne a ref piis ndaalde’u, soo roog we Yeerusaleem a ngemeñ kam fee, a mbi’tin o mbeq.

¹¹Nuun roog we Siyoŋ, sutooxyo mbuud o maad Salomo fee saqna o ndip onqe ya um a rokan’uuna na bes fee no ngulook um, bes fee xeeñ um a may’ina fo o ɗaay.