Read NQAARIIT NE ROOG A kim ale na kim ake 4 Bible Online

A kim ale na kim ake 4 - NQAARIIT NE ROOG bible

A kim ale na kim ake 4

¹Wo soo mos, wo fee buguuma, kaam ee wo soo mos! A kid of kaa nandtaa a nuukuur laqa muurax of, wiil of a nandtaa ged pambe ƥaal laa na fudoortiidaa no joong ole Galaad,

²a ñiiñ ake wo a naang taw nen ged paal tuuse kaa inoorna no ɓogand ole. Den fop owey fo siidandoong den. O leng na den yoqandee.

³Muuceek ke wo kaa nandtaa o seegit o yaxgu, o don of a yaawnoox, xa ƭek of a nandtaa xa ƥemb o goronaad laqa muurax of.

⁴O cok of kaa jigid nen taax-took ne Dawid, maxteena o waane. Pegoor juni key teen a lokel, ƥonax ke na salma-koor ake fop.

⁵Ƭeen ke wo kaa nandtaa caf teɓ, nen fo njiid mbat naa na suufaa a ndeer kaaf-a-tooq ke.

⁶Boo yilmaan fee a helko fo yenaa, soo yook ke yee mes, xam ret no joong olaa na miir fee fo no ñaang laa na cuuraay fee.

⁷Wo fee buguuma, kaa o mos ne fodee’oona fop. Sik fa leng refee na wo.

⁸O toog es, gari yoonit fa mi Libaŋ! Kaam ee gari yoonit fa mi Libaŋ! Fudoortiidi no jul ole Amana, no le Seniir fo no le Hermon, no qanq ke no cogoy ke, na xa coong axe na xa ƈaxal axe.

⁹O cigeen es, o toog es, kaa o ɗofnooraxam. Kaam ee kaa o ɗofnooraxam, yaa ɗeettaxamoona o ngid-o-nqoloos, fo o ƥaak o yuuɓir o leng kut no ceq ke wo.

¹⁰O cigeen es, o toog es, mbug of a fela lool. Ten moƴu o fel biiñ fuuf, too tuñ ke no ƭuumooxel ke wo moƴu o mbel qeeñe-xeeñe kuu ndefna.

¹¹Wo o toog es, muuceek of kaa seeɓaa suum. Suum fo fo sis ndefu yoora ɗelem of, too a qeeñaan ale no tikoorik of kaa nand fo ale Libaŋ.

¹²O cigeen es, o toog es, a ƭing a bege refo, a ngas a naage rap, a cur alaa jaafu’eena.

¹³Kaa o ref a ƭing taxar goronaad alaa mayna fo xa tim axaa mbelna lool fo fudand fo naar,

¹⁴naar fee fa safroŋ, lorye fa kanel[3], taxar ke na cooxtaa cuuraay fop, miir fa alowes fo ƭuumooxel ke moƴna o mbel.

¹⁵Kaa o ref a cur na ƭing ake, ref a ngas foofi fo ñoow, o xuluɓ olaa na fudoortiidaa Libaŋ.

¹⁶Nqeñ ne no ɓemb-roog o janoon, ɗisi! Nqeñ ne no ɓemb-roog o ñamaak, gari! Wuuɗi kam a ƭing ale mi, ndax qeeñe-xeeñe ke ten a naang sur. Fat oxe buguuma bug a gar na ƭing um soo a ñaam na xa tim xa pelu xe ten!