Read NQAARIIT NE ROOG A kim ale na kim ake 5 Bible Online

A kim ale na kim ake 5 - NQAARIIT NE ROOG bible

A kim ale na kim ake 5

¹O cigeen es, o toog es, mexe garaa na ƭing es, ɓooriid miir fee mi fo qeeñe-xeeñe ke mi, ɓaƈit xef es, ñaam suum ke, yer biiñ es fo fo sis es. Nuun qaariit ke, ñaamyo boo ngiñ, yer mbug ne boo mbay nep.

²Kaam ɗaan’u, ndaa yiif es kaa hirnoogu. Nanaam fangax, oxe buguuma bug na koŋ-koŋnaa. O cigeen es, wo fee jaranaxama kuu refna, a nuukuur ale mi, o ñaku sik oxe mi, wetanaam, yaam xoox le mi kaa liim, wiil es a siidaa xa toq axe no yeng ole.

³«Wolooxaam boo ƴut, nam boog um rokooxatinitkaa? Ɓogaam a caf es, nam boog um roɗgandatinitkaa a den?»

⁴Oxe buguuma bug a ñoomna o ɓay um no gom ole no begax ne, soo o laaw es a fiiƭaa yaam ten.

⁵Inooxaam ndax um wetan oxe buguuma bug, too miir fee a siidta na xa ƥay es, a xaarit no qol es, a xuƥand o damir ole no begir ke.

⁶Wetanaam oxe buguuma bug, ndaa a naaga mes, a suur. Yaacaam o xon, yaam ne ta retna. Waaƭaanum, too ga’inum, um xoyin, jaaɓiraam.

⁷Yeeyetax we na mbidaa teeru fee a nqeta fa mi. A nqawaxam boo a ngaañaam, a njaɓ kaala es, yeeyetax weene no saŋe ne.

⁸«Nuun roog we Yeerusaleem, mexe woornan a nuun, nu nga’angaa oxe buguuma bug, fat nu layin ee kaam bugin bo ta jiraam.»

⁹Wo fee moƴna mos no rew we, xar oxe bugoona bug a jegu, too o lakas jegiran, Ndi xar oxe bugoona bug a jegu, too o lakas jegiran, bo o xeɗoortaa a in neeke?

¹⁰Oxe buguuma bug kaa telelaa, a dey o koor, a anddeel a ndeer no wiin cuni-cuni.

¹¹Xoox le ten wurus fa nqoolu yoo, xa morol axe no wiil um a nand nen xa keec, a ƥalig ɗok nen a tooq.

¹²A kid um kaa nandtaa a nuukuur a ƭak paam xur foofi, akaa ƥogooxna no fo sis boo a ñootnooxaa na piingaan mbalka.

¹³Xa ƭek axe ten kaa nqeeñaa nen cimb qeeñe-xeeñe kaa na mbataa ƭuumooxel, muuceek um a nand nen ngaaf-a-tooq, a siidaa miir tigi.

¹⁴Xa ƥay axe ten kaa mooloox nen o loq wurus o mosandte kirisolit, cer um a ndef nen ñiiñ fa ñiig laa ɓodaxneena, a soorel safiir.

¹⁵A caf ake ten kaa ndef a toodook marbar akaa ndiƈooxna na caf wurus fa nqoolu, o mem um a nand fa Libaŋ, ta jektoox nen taxar seedar ke.

¹⁶O don um kaa ɓuuɓ yem, too ngiin um fop kaa yaawnoox. Nuun roog we Yeerusaleem, neene oxe buguuma bug a nandu. Kaam ee neene o fes es a nandu.