Read NQAARIIT NE ROOG A kim ale na kim ake 6 Bible Online

A kim ale na kim ake 6 - NQAARIIT NE ROOG bible

A kim ale na kim ake 6

¹Wo fee moƴna o mos no rew we, mam oxe bugoona bug a retu? Kaam ee mam oxe bugoona bug a jagnu, bo i mbaaƭtong o ten?

²Oxe buguuma bug a fudooxa na ƭing um, no cimb ke no qeeñe-xeeñe ke, ndax ta muudoor xa tim axe na ƭing ale, a gis kaaf-a-tooq ke.

³Oxe buguuma bug jegaxam, soo um jegin, ten fee na gayaa ged um ndeer kaaf-a-tooq ke.

⁴Wo fee jaranaxama kuu refna, kaa o mos nen teeru fee Tirsa, yul a ngid nen a Yeerusaleem, ndaa kaa o saɗarnoox nen a yaj no xiixire.

⁵Xuunangi, yaam a kid of kaa nduusaa cer es! Wiil of kaa nandtaa ged pambe ƥaal laa na fudoortiidaa no joong ole Galaad.

⁶A ñiiñ ake wo kaa naang taw nen ged paal laa inoorna no ɓogand ole. Den fop owey fo siidandoong den. O leng na den yoqandee.

⁷Xa ƭek of kaa nandtaa xa ƥemb o goronaad laqa muurax of.

⁸O maad oxe a waaga jeg rew qarɓeen ɓetuu fa leng, keƈ-a-salma qarɓeen ɓetuu tadik fo mboƥ ndoog naa mbaagaandeena lim.

⁹A nuukuur ale mi koy, o ñaku sik oxe mi, o leng koŋ a refu. O leng a refu na ya um, o ƥeem onqe ta moƴna fex. Mboƥ ndoog ne na nga’an kaa nqoyan o ƭaayu xe, rew we no maad oxe fo keƈ-a-salma ke ten a tagasan ee:

¹⁰«Ndi an oo xene na miric-miricnaa nen o xoor mbeet ole, a mosit nen o nqool onqe, a meleƈtaa nen njeeƈ ne soo a saɗarnoox nen a yaj no xiixire?»

¹¹Fudooxaam na ƭing taxar amaand ale, ndax um ɗeet col ke na yulanq ale, boo ga ndax taxar biiñ ke we morolaa, goronaad ke a mbiɗaa.

¹²And’atiim ke heluuma fi yaam ɗaay bo, nen oxaa rokna fa garmi na sareet um[4].