Read NQAARIIT NE ROOG A kim ale na kim ake 7 Bible Online

A kim ale na kim ake 7 - NQAARIIT NE ROOG bible

A kim ale na kim ake 7

¹«Wo o ñaku sik[5] oxe, nomtooxiidi, nomtooxiidi! Ko ndeeg, nomtooxiidi, ndax i mbuudong!» «Xar nu mbuudtaa o Suusulam oxe nen oxaa na fecaa ndeer o lang?»

²O ƥiy garmi nqe, a caf ake wo soo nqen lool kam xa ñaaƭ axe wo, a pek ake wo a nandtaa ceq kaa xa ƥay no kiin o baane’u a njalna.

³Daɓ le wo kaa nandtaa a tokol a qerelooxu laa sambirkeerna fa biiñ fa njule, o fud of a nandtaa jind bele laa widneena kaaf-a-tooq.

⁴Ƭeen ke wo kaa nandtaa caf teɓ, nen fo njiid mbat.

⁵O cok ole wo kaa jigid nen taax-took mbi’te a ñiiñ fa ñiig, a kid of a nandtaa peel ke Hesebon, paam o don-maax ole Bat-Rabim[6]. O ñis ole wo kaa nandtaa taax-took ne Libaŋ, na yetooxaa me farna fa Damaas.

⁶Xoox le wo kaa naag jad nen o joong ole Karmel, wiil le wo a lipaa nen piis ndaalde’u boo o maad sax a waag o jom teen.

⁷Kaa o mos lool too yaawnoox, wo fee buguuma, wo o ɗaay es.

⁸O mem of kaa nandtaa ngeec, soo ƭeen of a nand fo a ƭeeɗeem ake ten.

⁹Layaam taa kam es ee: «Xam ŋaay no ngeec ne, pok xa tim axe!» Ƭeen ke wo kaa mbelit nen tuunq xa biiñ, xa lus axe wo a safaa nen xa pom,

¹⁰soo o don of a felit nen biiñ fa mbelu faa na siidaa no muuceek fo na ñiiñ.

¹¹Mi, oxe buguuma bug refanum, too ten oo mi a yuxmaa.

¹²Wo fee buguuma bug, gari! Aca i sutoox, ndet na koƥ ale, mbe’aa ndeer pudand ke!

¹³Nqes teel, xan i ndet na ƭing taxar biiñ ake boo nga ndax taxar biiñ ke we morolaa, piɗ ke a mbuñit, goronaad ke a mbiɗaa, too maaga um lalitkang mbug es.

¹⁴Mandargoor[7] ke a naanga sur a qeeñaan den, too i njega na xa ton-maax in xa tim xa pelu xuu ndefna, xa qas axe nen xa kiid axe. Wo geekanum a den, wo fee buguuma bug.