Read NQAARIIT NE ROOG A kim ale na kim ake 8 Bible Online

A kim ale na kim ake 8 - NQAARIIT NE ROOG bible

A kim ale na kim ake 8

¹Ey, o reeƭangaa o camin es rek, oxaa i numna ƭeen leng, xetkoogaam fa wo tafil, foonong, too ŋañkoogaandeem.

²Ɓiskoogaaxoong no mbind ya es fee jangnaxama fop, soo um yernoorong biiñ fa njule, ñimnong no ngoon onqe na xa goronaad axe mi.

³Kaa hakandnaam o ɓay um o janoon, soo a ñamaak um a morgooxaam.

⁴Nuun roog we Yeerusaleem, mexe woornaa a nuun ee ba nu yaqan a in nuɗir in. Kaam ee ba nu ƭegin, too i mbugafuliran.

⁵An oo xeene na inoortiidaa na koƥ-a-ƥor ale, a damir fo xe ta bugna bug? Yoktaaxoong ɗuga ndaxar pom ne, me ya of a fudtoonga sax sax, maaga ta rimtoonga.

⁶Faƭaam no xeeñ of nen mandarga, nen o anddiloor olaa refna no ɓay of, yaam mbug kaa jeg doole lool nen fa nqon, a ɗom boo nen a jaaniif, a doxaa riw nen ƈulfaan sumu jip, nen fiɗel[8] laa moƴna o saas.

⁷Poofi cegu doole ke mbaagee o ñuf fiɗel le no mbug ne, too xa quluɓ axe mbaagiran o ƭuud. Boo o kiin a cooxit’ina kalal ke ta jegna no mbind um fop oo, ndax ta sofit a den mbug ne, o xeefel doŋ a xotitkaa teen.

⁸I njega o cigeen oxaa ƭeen um a urnafuleerna. Xar i mbi’ankan, yaa ta ñaaƴiideena?

⁹A refangaa saŋe, xan i max took um a muul xaaliis fa nqoolu, ta soƥ ee o don-maax oo, xan i mosandtin a teex ndaxar seedar.

¹⁰Saŋe refum, soo ƭeen ke mi a ndef teen nen taax-took, too fadaam a tolax na kid no xe bugaxama.

¹¹Salomo a jeg’a a ƭing taxar biiñ Baal-Hamon, a doxnin jaajal, too oxuu refna na den a ɓisiidooga xa qanjar juni xaaliis na xa tim axe ten.

¹²A ƭing taxar biiñ ale mi koy, mi jegoodun, yetooxan, xa qanjar juni xe mat wo jegun, wo Salomo, soo teemeed ƭik ke, jaajal we a njegin.

¹³Wo fee genna na ƭing ake, qaariit ke mi owe ndunga nof no ñuxur of, ngela nannooraam o ten!

¹⁴Wo fee buguuma bug, ñofi gar took xa coong axe suleena qeeñe-xeeñe, nen mbat mbaat njaf ndeɓ!