Read NQAARIIT NE ROOG Esayi 17 Bible Online

Esayi 17 - NQAARIIT NE ROOG bible

Esayi 17

¹Ke na dalkaa a Damaas: Te paam rek, Damaas limitkataand no teeru ke, yaam xan a refat ƭaaq ƥor.

²Teeru ke ta waxooxna xan a nqaƴel boo faw, a ƥoxotel xa siir axe na mbugko suufaa teen, too o leng fiiqilkee a den.

³Saŋe ke Efrayim xan a maafel, a maadax ale Damaas a ñuf, soo muj fee no ke na yoqkaa na Araam a nand fa fee no ndam onqe Isra’el. Keene o Yaal oxe Hupna fop a layu.

⁴A koom, xan o meɗel ole Yakoob a heesat, soo o jeg cer um a wat.

⁵Xan a nand nen sañ bele naa o saasaxad oxe a pokna, ndax ta saxad xa yaƥ axe. Xan a nand nen yaa xa yaƥ axe a ngisaatooxeel na xa saawit axe no Reerefa we.

⁶Kisaatooxel soom na yoqkataa teen nen ndaxar oliiw ƥoore. Xa oliiw xa ƭaq mbaat xa tadaq rek na yoqataa na cul ale no ndaxar oliiw neene, soo xa nahaq mbaat xa ƥetaq a yoq na naaq ake. Keene o Yaal oxe Roog fee Isra’el a layu.

⁷A koom, xan o kiin oxe a haan no Saasak um, a kid um a naang jak o Tedu xe Isra’el.

⁸Ɗeetkatee farna fo xa sadaxand axe ta jaloodna too haankatee no ke ta fi’itna qol um mbaat na teex a lupe ke Asera mbaat no toxir qeeñe-xeeñe ke.

⁹A koom, xan teeru cegu saŋe ke Isra’el a mboot, ne ta refit’ina no teeru ke no Hiihiwi[21] we fo ke no Aa-amori we, ye Ii-isra’el we a mbadiidna. Xan a refat a koƥ-a-ƥor alaa naagna halit.

¹⁰Kaa o weec a Roog fee na muclang, too wetandooxiro ɓil le refna ndaɗand of. Ten taxu o jimbanaa pangool ke taxar pelu, saxnanaa a den taxar biiñ.

¹¹A koom alaa jimboona a den, ga’o a den da maakaa, soo roog a feed, da ndef no mbiɗaa, ndaa saxade le xan a gaay, yaa ñaal o njombe ne a garna, too ɗom of waagkaand o wodand.

¹²Ey! Fangax le na saax a cegee hap ake na jibtaa nen fangax le na xa maag axe. Ŋurŋur le no qeet ke na nandtaa ŋurŋur le na yag-ee-yag a cegu doole ke.

¹³Qeet ke owe ŋurŋurnaa nen poofi cegu doole kaa na nqawraa, ndaa yaa Roog a ŋalkaa a den, xan a ƈuf koƭu, a ndaxeel nen ñaax laa nqeñ ne na xa coong axe a yetnaa, nen mbuyaambuy laa a und a maak a maƥna.

¹⁴Boo ta yaarna diid rek na refataa meen, boo ta helko fo feedaa o pañ oxe yee mes. Keene refu a las no we na mbaltaa a in, muj no we na nguytaa a in.