Read NQAARIIT NE ROOG Esayi 19 Bible Online

Esayi 19 - NQAARIIT NE ROOG bible

Esayi 19

¹Ke na dalkaa a Misira: O Yaal oxe xey, a garaa Misira kam eel ñofu. Pangool ke Misira owe sendaa mbaambir um, soo njambaar ne no Miimisira we a ɓutaa kam den.

²«Xam riñ o Miimisira ta song o Miimisira kend um, too oxuu refna xan a ñoxor fo o pog um, xaariit fa fa ngend um a ñoxor, teeru ke a ñoxor a ndeer den, soo maat ke neen.

³Njambaar ne no Miimisira we xan a ɓut na den, too xam jaxasrand yuuƥ ke den. Maaga, xan da laamtaa pangool ke den xa as soo a nga’raa fo fan we fo ɗeet we fo we na ƈufginooxaa xon we.

⁴Xam ɓoxot a Misira na xa ƥay no yaal o ƭomu tig. O maad oxaa na ƴaxooxaa xan a maadoox took um.» Keene o Yaal oxe na refkaa boo faw Hupna fop a layu.

⁵Poofi ke Niil xan a ŋiis, o xuluɓ ole a weerat koroŋ boo dara xuƥkatee teen.

⁶A banj ake xan a nqooñaa, xa quluɓ axe Misira a uupoox soo a ŋiis, jalax le fo xeet le a gaay.

⁷Daaƭ le lernooxna o xuluɓ ole Niil fo me ta saltitna no maag ole fo lanq qaaɗu ke ten xan a mbeer, a qeñ ale a pasar a den da sooƴ.

⁸Faafaal we owe ƭomatooxaa soo a naqadiloox. Fop we na njaaraa kam o xuluɓ ole Niil fo we na ndeɓaa mbaal no poofi ke xan a ngooy.

⁹We na ƭiraa fa liit fee fo we na ndiwaa coor ke xan a njaaxiɗ lool.

¹⁰We na mbi’aa a yer ake kaa njaq, soo kam no we na saadlaanaa a fag tak.

¹¹Kelfa ke Cowaan[22] ɗof ɓat a ndefu. Aa-as we Firawon fee moƴna o njeg o and kaa cooxtaa xa as xa ñaku xoox. Nam nu saɗu o layit a Firawon fee yee: «O ƥiy no yaal-o-and refum, o ndaan no maad we yaaga»?

¹²Mam yaal-o-and we wo a ndefu boog? Fat da yegnong boog too a andnoorong ke o Yaal oxe Hupna fop a fosooxanna a Misira.

¹³Kelfa ke Cowaan kaa ƥodax, ke Memfiis a ndef na xa andand. Aa-adax we na carind ake Misira kaa mo’andan.

¹⁴O Yaal oxe a picta a ndeer den yiif o ngulmataan, da mo’and Miimisira we na pi den fop bo da nandat fo o kiin o bayu xaa na jayang-jayangnaa soo a waslaa.

¹⁵Kuu Misira a waagna o fi’aa ñaaƴkee, ta ref ee xoox le mbaat a las ale, ngeec ne mbaat xeet le na fi’an.

¹⁶A koom, xan Misira a nand nen o tew. Xan a send yaam diid, yaa o Yaal oxe Hupna fop a yoɗankan o ɓay um.

¹⁷Lanq ke Yudaa xan a ndiidnooraa a Misira. A mbanuu ta ne’eena rek, xan Misira a diid, yaam ke o Yaal oxe Hupna fop a yuuɓanuuna.

¹⁸A koom, xan a jeg teeru ƥetik no saax le Misira kaa na mbugko layaa a hebre, soo we ngenna teen a ndaaɓoox ee no Yaal oxe Hupna fop a mbogu. Leng no teeru keene xan a xoyeel «Teeru fee no njeeƈ ne»[23].

¹⁹A koom xan a jeg o sadaxand no Yaal oxe a ndeer ee ndeer saax le Misira fo ɓil laa ta sipaneena no ŋat ole no saax le.

²⁰Kam Misira, kene xan a ref o anddiloor fo seede no Yaal oxe Hupna fop: Yaa da ƈufginooxkaa o Yaal oxe yaam we na ñagadilaa a den, xan a heblaniid a den o Muumucil fo o paafarit oxaa na watkaa a den.

²¹Maaga, xan o Yaal oxe a andnoox kam saax le Misira. A koom, xan Miimisira we a and o Yaal oxe, a mbaɗoortin sadax fo ci’it, a ndegoor fo ten soo a mbadin ke da ndegitna.

²²Xan o Yaal oxe a xaw Miimisira we, ndaa xan a wodand a den itam. Xan a ngeleeroox me no Yaal oxe, too xan a jaɓ a qeƭ den soo a wodand a den.

²³A koom, xan a jeg a qal alaa inoorna Misira, a jof Asuur. Aa-asuur we xan a ndetaa Misira, soo Miimisira we a ndetaa Asuur, too Miimisira we fo Aa-asuur we xan a mbaɗooxandooraa o Yaal oxe.

²⁴A koom, Isra’el na dadkandkaa a Misira fa Asuur, a ref barke a ndeer lanq ke fop.

²⁵O Yaal oxe Hupna fop xan a barke a den na xa ƭelem axene: «Misira fee xeet es fa Asuur fee saktuuma xa ƥay es fa Isra’el fee refna o jeg es a ngela o mbarke’el.»