Read NQAARIIT NE ROOG Esayi 2 Bible Online

Esayi 2 - NQAARIIT NE ROOG bible

Esayi 2

¹Keeke ndefu xa ƭelem axe o Yaal oxe a feeñilna a Esayi fee o ƥiy Amoc da njagin na Yudaa fa Yeerusaleem.

²Xan a jeg camaane kaa, o joong ole no Mbind ne no Yaal oxe a garitkaa xa coong axe fop took, a yooroox a ñaang ake fop, too xan qeet ke fop a njagin teen.

³Qeet mayu xan a inoox, a lay ee: «Ngaryo i ŋaay no joong ole no Yaal oxe, no Mbind ne na Roog fee Yakoob, ndax ta jangin a in a ƭat um, soo i ñaaƴ na qal um, yaam a cangin a tiindigil ale Siyoŋ a inooraa, fa lay fee no Yaal oxe a hatiidaa Yeerusaleem.»

⁴Xan a ref o ƭeeɗeg hate ndeer a saax ake, a ref o qaaxaf no qeet mayu. Xan a nqawin no laƥ ke den xa koŋko soo na salma ke den, da njalin teen xa taaba. Saax leng inooxankatee saax gend um, too xire aqatooxkataand.

⁵Nuun we xa taan Yakoob, ngaryo i ñaaƴ na qoolaand ale no Yaal oxe.

⁶O Yaal oxe, waasaa xeet of pelek. Kaam ee xaƴaa mbind Yakoob, yaam kaa may fo fo mbaax ne no batand, maɗag ee gañ teen nen saax le no Fiifilista we, soo a ndimaa fo we da mbogteerna xeet.

⁷Saax den kaa may fa xaaliis fa wurus fo kalal pagkatar, pis ke a naang teen gañ, too a sareet-xire ke den, o leng andee ne da mbodna.

⁸Kaa mayƭand saax den fo pangool, a ngungaa mbaambir ke xa ƥay den a njalna, a mbaɗooxaa ke qol den a mbi’na.

⁹Kaa koy, wiin we fop xan a neewandoox, a yer fo ut ole, too wo o Yaal oxe, ba o inatin[4] a den.

¹⁰Laqooxyo kam ee kam a ƥil ake, ndok kam lanq ke, ndax nu ƈuf katil saɗarnooxu ne no Yaal oxe fo o magnel ole no ndam onqe ten.

¹¹O kiin oxe na ɗeettaa nga’yaamoo xan a lupandoox, o ka’atinooxu xe a yoornoox. Na bes faaga, o Yaal oxe soom na andkeel nen oxaa yoɗooxna.

¹²Bes fee no Yaal oxe Hupna fop xan a dal took fop ke magnandooxna fo ke ga’atinooxna, a fudin fop ke yoɗooxna.

¹³Xan a dal took taxar seedar ke Libaŋ fop njigidna, a naang lawlaw fo kariñ ke Basan fop

¹⁴fo xa coong xa koƭu took axe fop fo a ñaang a ciig ake fop

¹⁵fo taax-took maak ke fop fo saŋe ke saƭikna koŋ

¹⁶fo a kaal a maak a cula’ir ake fop na ndetaa Tarsis fo ake moƴna o mos.

¹⁷O kiin oxe magnandooxna xan a lupandoox, soo o kiin o maak oxe a neewandel. Na bes faaga, o Yaal oxe soom na andkeel nen oxaa yoɗooxna,

¹⁸too pangool ke fop xan a ñuf.

¹⁹Ndokyo kam luf ke na xa coong axe fo kam qanq ke no lanq ke, ndax nu ƈuf katil saɗarnooxu ne no Yaal oxe, laqoox o magnel ole no ndam onqe ten, yaa ta inooxkaa, ndax ta yo’in adna fee.

²⁰A koom, xan wiin we a ndeɓan a pom ake fo a ƭeem ake pangool ke da mbi’itna wurus fa xaaliis, a ngungaa mbaambir den,

²¹a ndokik na semb ake na ƥil ake fo na baaƥ ake na xa coong axe, ndax da ƈuf katil saɗarnooxu ne no Yaal oxe, soo a laqoox mbaambir o magnel ole no ndam onqe ten, yaa ta inooxkaa, ndax ta yo’in adna fee.

²²Mbaasyo ngoolooxaa o kiin oxe o ñoow um a hapeena no haaƭ soom. Ndi xar refu o njiriiñ um?