Read NQAARIIT NE ROOG Esayi 20 Bible Online

Esayi 20 - NQAARIIT NE ROOG bible

Esayi 20

¹O aa-adax oxe no xiixire we Sargon fee o maad oxe Asuur a wida teeru fee Asdod[24], a songin soo a jaɓin.

²Xa kiid xa tadaq yaaga keene xewafulee o Yaal oxe a lay’a a Esayi fee o ƥiy Amoc, a heblin ee: «Reti wol o saaku le derooxoona too wol xa ñaaƭ of.» Esayi a fi’’a naaga, a ñaaƴaa duŋ fo a caf a ƥor itam. Cinj xa kiid xa tadaq,

³O Yaal oxe a laya yee: «Ne Esayi fee o tag es a ñaaƴitna o ƥor, too o ñaaƭ reefiran boo xa kiid xa tadaq, ndax ta ref o anddiloor fo mandarga na Misira fa Kuus,

⁴neene o maad oxe Asuur a ɓisitkaa Miimisira we ta damna fo Kuukuus we ta sutna saax den, xa pes axe fo nogoy we, da yoq o ƥor, a ñaaƴaa a caf a ƥor, soo a cinj den a ndef tafil. Ndaw gaci na Misira!

⁵Maaga, we ƭag’ina yaakaar den na Kuus fo we mbi’’ina a Misira qaaƴoor, xan a ndiid soo a sed.»

⁶A koom we ngenna na xa cegel axeene, xan a lay ee: «Ke reeƭna yaakaar in de a sooƴa. Maaga i yaakaaroogu o njaɓnoox, ndax i ƈufgel soo mbatel no maad oxe Asuur. Ndiiki koy, nam i ndaɗitkaa?»