Read NQAARIIT NE ROOG Esayi 23 Bible Online

Esayi 23 - NQAARIIT NE ROOG bible

Esayi 23

¹Ke layeena na Tiir: «Nuun a kaal a maak a cula’ir ake na ndetaa Tarsis, ƭomatooxyo, yaam waax nuun a gefe tuƈ.» A yegaan, ye da inoorna no fimb laa Sipere, a ngataa.

²«Nuun we ngenna paam o maag ole, ndamyo xa ton, nuun jula we Sidoŋ, duleer nuun a nqaañaa o maag ole.»

³No tuufe-duufe ke no xuluɓ ole fo no saxade le Niil o jeg um a hatoogu, a ɓeeriid no poofi yaaju ke. O ten reeƭu luuma fee na saax ake.

⁴Wo Sidoŋ, saŋe ne no maag ole, refi na gaci, yaam keeke o maag ole a layu: «Gaajooxkiim, ñootkiim too ñoowinkiim mboƥ ngoor mbaat um yar xa caaƈ xa tew.»

⁵Xan Miimisira we a send, yaa da ndaawkaa o nan ole na fa yaq fee Tiir.

⁶«Nuun we ngenna paam o maag ole, ndefyo na coytax, ƈaktoox boo Tarsis.

⁷Ndax keene refu teeru fee nuun xumb’ina bo, too cosaan um a ref no miñu kaa, teeru fee xa ƥeem a ngenik’ina na xa cegel xa koƭu?»

⁸An fosooxanu keene a Tiir fee lastoona fo ndip, ten oxe jula we a ndeeƭna gelwaar, soo jiijikax um a niw’el no lanq ke fop?

⁹O Yaal oxe Hupna fop fosooxanun keene, ndax ta watin a magnandax ale no fop ke na yulaa a ngid, a neewand fop we niweena took lanq ke.

¹⁰«Wo Tarsis o ndoog onqe[28], ɓaarooxi lanq of nen o xuluɓ ole Niil, yaam jegatiro waax.»

¹¹O Yaal oxe a letna o ɓay um took o maag ole, a sendnoor maat ke. A hebla, ndax saŋe ke Kanaan a yaqel.

¹²A laya yee: «Wo Sidoŋ o ndoog onqe, o mbelakinax of a faga, wo fee gigin’eena, yeen andafuliro adna. O inooxangaa, ret boo Sipere sax oo, jegitkiro maaga a ñootnax.

¹³Nga’yo saax le no Baababilon we, xeet feene a ñufa ɗuƭ. Asuur a jagandanaan paafal ke na koƥ-a-ƥor ale. A ngeenin’a taax maak yetooxand, a max pind mosu, ndaa Asuur a gefa a den tuƈ.

¹⁴Nuun a kaal a maak a cula’ir ake na ndetaa Tarsis, ƭomatooxyo, yaam saŋe nuun a luƈte.»

¹⁵A koom, xan Tiir a weecel boo xa kiid qarɓeen ɓetuu ƭik fodirna fo ke o maad a warna o ñoow. Cinj xa kiid qarɓeen ɓetuu ƭik axeene, xan ke a kim alene a layna na caga le, a dal a Tiir:

¹⁶Jangi o nqilimb, widaa kam teeru fee, wo a caga le weeceena! Xilimbi a paax, xaanaa fañ o waas, ndax o wetandooxel!

¹⁷A cinj xa kiid qarɓeen ɓetuu ƭik axeene, xan o Yaal oxe a wetandoox a Tiir, too xan a daawatinaa ndabid um no njaga[29] ne ten soo a jaga’aa fo maat ke na adna fee fop.

¹⁸Kaa koy, ke ta bugko jegaa teen fo ndabid um xan a kesanel o Yaal oxe. Fokatkaand mbaat ta geekel, ndaa xan a ref ñaamel teyu fo toki mosu no we ngenna mbaambir no Yaal oxe.