Read NQAARIIT NE ROOG Esayi 24 Bible Online

Esayi 24 - NQAARIIT NE ROOG bible

Esayi 24

¹O Yaal oxe xan a fi lanq ke a mbes a pec, a ruudin a den, a noot adna fee soo a picit we ngenna teen.

²Leng kut ke na dalkaa o saasadax oxe fo lakas we na xeet fee, o yaal mbind oxe fo surga um, o tew o yaal mbind oxe fo o ceefeer um, o ciijikax oxe fo o ciijik oxe, o ƥaaɓandit oxe fo o luuluɓ oxe, o taarabdinax oxe fo o taarabid oxe.

³Lanq ke xan a mbes a pec, a seeƭel fop, yaam o Yaal oxe layu keene.

⁴Lanq ke owe no ñaawax, a mbag tak. Adna fee oxe ŋeesooxaa, a neewaa doole, soo asamaan fee a ŋeesooxandooraa fo lanq ke.

⁵We ngenna no lanq ke maasandu a den, yaam kaa niwaƭar’u kebil ke, a sufaalaa bargal ke, a ƭegaa ngiɓoor ne na refkaa boo faw.

⁶Ten taxu a salax ale a raaɓaa lanq ke, soo we ngenna teen a ngadooxaa tooñ den. Ten taxu we ngenna no lanq ke a sooy, too ke yoqatna no wiin we jaakatee.

⁷Biiñ fa mbelu fee oxe no ñaawax, ndaxar biiñ ne a leeƥaa. Fop we njeg’ina o ɗaay na qeeñ den, owe iinaa.

⁸O ɗaay ole na ñal ake a wata, fangax le na fa ŋas fee a riim, o mbelakinax onqe no fo nqilimb ne a tiim.

⁹Biiñ yerataand fo a kim, a yer a qaaɗu ke a naangat xut no yeeyer we.

¹⁰Teeru fee fes’ina a pec a tase, pind ke fop a mbegel boo o leng waagatee o rok teen.

¹¹A coytax oxe jibaa no ped ke yaam biiñ fee dangna, o ɗaay ee mes, o mbelakinax onqe a raxel saax le.

¹²Yaqe ƥor refatu na teeru fee, begax ke ten a nduguñel boo a naang nem.

¹³Ke na yoqkaa no qeet ke took lanq ke xan a nand nen yoqatin ndaxar oliiw ƥoore, nen fo nduunq biiñ fo ngisaatooxel cinj a ƥoor ale.

¹⁴Yoqatin weene a mbangna xa ñuxur den, a njibin xa ƈeel. «Nuun we no mudand, soroxole’anyo o Yaal oxe.

¹⁵Nuun we no batand, ƥoxotyo o Yaal oxe o ndam. Nuun we na pimb ake no maag ole, lambinyo gon le no Yaal oxe Roog fee Isra’el.»

¹⁶In we nanaa a kim a inooru no cat adna yee: «O cofu xe a ɗaaya.» Mi o mat, kaam lay ee: «Kaam fag! Kaam fag tak! Sabab took es!» Hoohod we owe ngodaa, owe ngodaa tigi, oxuu moƴuuna waag o kend um, oxe fi’an.

¹⁷Diid le fo gamb le fo mbaal ne owey ƥeedang, woxe genna no lanq ke!

¹⁸Oxuu na ƴufaa xa buuq axe no diid le xan a yen kam gamb le, too oxe na sutooriidaa no gamb le xan a damtel mbaal ne, yaam pand ke took xan a mbetoox, soo fer le no lanq ke a yo’noox.

¹⁹Lanq ke xan a qaacoox qaacax maak, a ngirdoox yureet soo a ngiiƈ-ngiiƈin ƭomu.

²⁰Lanq ke we njayang-njayangnaa, ne o kiin o bayu a jayang-jayangnitaa, a njaayooxaa nen o ɗaakaand. Tooñ um a sufooxa took um, ta yen too inooxkatee muk.

²¹A koom, xan o Yaal oxe a xeloor fo a yaj ake no yaal kumnax ke ndefna took-ee-took fo maad we na adna fee ndefna took lanq ke.

²²Xan a ndef faɗ waa mbokateena kam gamb, a ndamel, a ngumel, soo a cinj camaane miñu da layoorel.

²³A qoor ale xan a gaci, soo njeeƈ ne a sed, yaam o Yaal oxe Hupna fop xan a maadoox took o joong ole Siyoŋ, na Yeerusaleem, too xan o ndam um a meleƈ na kid no maak we.