Read NQAARIIT NE ROOG Esayi 29 Bible Online

Esayi 29 - NQAARIIT NE ROOG bible

Esayi 29

¹Ari’el[31], Ari’el, ndaw naqad took of, teeru fee Dawid a dal’ina! Ƥaatyo o hiid no leeke, nqaƴ qew ke da mbadatinoox,

²boo um ɓiiklong, wo Ari’el. Ƭomatax fo xa iin rek na mbugko nanateel me wo, too xan o refat na mi nen o sadaxand es.

³Xam sip saŋe me widoonga fop, wegong kam pegoor soo yoɗanong a ƈoong.

⁴Xan o fudnel, fa lay of a inoortaa a lanq, xa ƭelem of a moƴ o yoor a lanq fo ut ole. O ñuxur of xan a sutooraa no lanq ke nen o ñuxur no qon, soo o ŋurŋurnitaa no fo ut ole.

⁵A yaj ale no fañ we wo xan a mayit nen fo ut, soo we na ƥiiklang a mayit nen ñaax laa na yetaa. Kaa koy, ndak fo ndak, ndeer ñaf fo ƭeet,

⁶o Yaal oxe Hupna fop xan a muclitong ƭuuɗ fo yo’nax lanq fo fangax maak fo nqeñ fo a und a maak fo aal fiɗel laa na raaɓaa.

⁷A yaj ake na saax ake na nqire’kaa fa Ari’el fo we na songkan, a mbidin o kurul-keƥ soo a mbugin o ngef tuƈ, den fop xan a ñuf nen o ƭaaɗ, kaam ee xan a sooƴit nen o ƭaaɗ o paaxeer.

⁸Maaga, ne oxe xeexeena a ɗaaɗtaa ñaamaa, soo a yokoor o fud o ɓacu fo ne oxe hoɗomeena a ɗaaɗtaa yeraa, soo a yokoor a peep a beeru, neene a refitkaa na yaj ake na saax ake na nqire’kaa fo o joong ole Siyoŋ.

⁹Njomi’yo too njaq! Mbuulyo, too ba nu nga’at, mbay, too biiñ taxiran, tifil-tifilnaa, too a yer a qaaɗu ɓekiran a nuun,

¹⁰yaam o Yaal oxe kaa ɓek na nuun yiif ɗaaɗaan, a fuulin a kid nuun ndefna duleer we soo a muur xoox nuun refna ɗeet we.

¹¹Peeñil ke fop kaa ndef na nuun nen xa ƭelem no safe wegte o ñaasir laa cooxeena o cangu, a layel ee: «Jangi kene boog!», soo ta doon ee: «Waaginum, yaam kaa wegel.»

¹²A cooxange o cangeer, a layel ee: «Jangi kene boog!», xan a doon ee: «Jangiim.»

¹³O Yaal oxe a laya yee: «Xeet fene o don fo muuceek soom a niwtaxam, yaa da matiidaxam, ndaa a qeeñ den kaa ngoƭaam, too caƭar ne da njegna na mi kaa ref o reef soom kaa o kiin a dalinna.

¹⁴Ten taxu xam maad o jaaxɗandtaa xeet fene comlaand. O jeg-yiif ole no jegu yiif we ten xan a mo mir, o and ole no yaal-o-and we ten a sooƴ.»

¹⁵«Sabab took no we na ƭasaa o Yaal oxe, ndax da laq yuuƥ ke den. A pi den no niɓaan a mbi’eel, too kaa da layaa yee: ‹An waagu o ga a in? Ndi an waagu o andid a in?›

¹⁶O ƥodaxel jolkee le den! Ndax o maamax qaw a waage o fodandit ƭok ke? Ndax ke maxeena a waaga o lay no xe maxuuna yee: ‹Fi’iraam›? Ndax o jalag a waaga o lay o maamax um ee: ‹Andiro tus›?»

¹⁷A woora yee ndeer mene fo a pe a mayeer xan Suungaan le Libaŋ a refat nen a ƭing, soo a ƭing ale a nand fo suungaan niɓu.

¹⁸A koom, xan ram we a nan ke layeena kam safe le, soo fuul we a ƭeet, yaa da sutteena no ɓaal-ee-ɓaal le no niɓaan ole.

¹⁹O Yaal oxe xan a ref no we neewandooxna a cur o ɗaay o maak, we moƴna o ndool no wiin we a mbiltoox fa baneex no Tedu xe Isra’el,

²⁰yaam o ñaañagadil oxe a wata meen, o qaaxaadnax oxe a sooƴ, soo fop we ƥerexoogna, ndax da mbi lakas we paaxeer, a saŋkel,

²¹den we njamboogna lakas we paaxeer, a mbogaa haahate we, soo a mbegnooraa oxe dam’ina na ƭat.

²²Ten taxu, keeke o Yaal oxe watna a Abraham a layu we no mbind Yakoob: «Yakoob sedkatee ndiiki, too mukit um seeƈaarkatee,

²³yaam yaa xa ƥeem a nga’kaa ke um fi’kaa a ndeer den, xan a tedland gon es. Xan a tedland o Tedu xe Yakoob, a saɗar a Roog fee Isra’el.

²⁴We a yiif den a ngulmoogna xan a ndaaw o jeg-yiif, soo we ñunqumtilooxoogna a njaɓat o njangnel.»