Read NQAARIIT NE ROOG Esayi 32 Bible Online

Esayi 32 - NQAARIIT NE ROOG bible

Esayi 32

¹Xan a jeg o maad oxaa na maadooritkaa o cofel, soo gelwaar we ten a adoorit a ƭat.

²Oxuu refna na den xan a ref nen laqooxand naa na fegaa nqeñ ne fo ndaɗand naa na kalaa a und a maak ale, a ref nen a ƈufnand foofi kam o mbiñ o mbeeru, nen yook ɓil maak no lanq koɗome.

³A kid ake no we na nga’aa niifaarkatee, too we na nanaa xan a ndung nof den, a nan-giloox a paax.

⁴We mbeleerna a yiif xan a andat a paax, soo we na ndo’aa a layataa ta ñof soo a xool.

⁵O ƥodaxu xe xoykataand garmi, too o naanax oxe fi’kataand o kiin o maak.

⁶Yaam o ƥodaxu xe ƥooɓodaxir rek a layaa, too xeeñ um paaxeer soom a liiƥaa, ndax ta fi qoolaƭaru. Fa lay um no kaa jofna no Yaal oxe kaa mo’nooraa, o laaw no xe xeexeena, ta xaƴin o ƥor, soo oxe hoɗomeena, ta xañtin a yer.

⁷O naanax oxe ƥonax qaƥu a jegu. Kaa ɗaapaa yuuƥ paaxeer, ndax ta gefit o ndool onqe xa maaƥ soo a xañtin ɓur um.

⁸Kaa koy, oxe mosna kam a qalaat a mosu a saqaa, too a pi a mosu soom na inan.

⁹Nuun rew we yaadooxna, inooxyo, nan-giloox o ñuxur es. Nuun mboƥ ndoog ne yegeerna dara, ndungyo nof nuun na fa lay es.

¹⁰Ndeer mene fo o hiid fo ñaal leng-leng xan nu sendaa, nuun we yaadooxna, yaam a ƥoor fo a saxad njegkatee.

¹¹Njaaxiɗyo boog, nuun we yaadooxna. Sendyo yaam diid, nuun we yegeerna dara. Mbolooxyo boo yoq duŋ soo nderoox o saaku.

¹²Ndiqooxyo no ngang, loolan xa qol xa neepu xe fo taxar biiñ tiirim ke.

¹³Loolanyo lanq ke na xeet fee mi na saxaa tomb fo takar-ñiig, loolan itam pind ke ndefna no ɗaay fa teeru fa nqumbu fee.

¹⁴Mbind no maad ne xan a fes a pec, teeru fa yo’nooxu fee a waasel. Me o yetooxand ole fo saŋe ne no ñaang le Ofeel a ndefna xan a refat boo faw o ndaatan na xa paam-a-koƥ axe fo o suufand na xa siir axe.

¹⁵Neene a refitkaa boo yaa o Yaal oxe a fudinkaa took in Yiif um. Maaga, a koƥ-a-ƥor ale xan a ref nen a ƭing, soo a ƭing ale a nand fo suungaan niɓu.

¹⁶Xan a ƭat a gen na koƥ-a-ƥor ale, soo o cofel ole a maadooxaa na ƭing ale.

¹⁷O cofel ole xan a rimaa jam, a gartaa a ñootnax fo o woor boo faw.

¹⁸Xeet es xan a ngen no ngenand jam, kam xa taland xa booru, na xa ñootnoorand xa yaadooxu.

¹⁹A kalam a ƥuuɓu ke xan a ngaak suungaan le, teeru fee a gefel tuƈ.

²⁰Kaa koy, nu ƭaaya, nuun we mbaagna o nduuf muu refna paam poofi ke soo mbokit qoox ke fo xa paam axe da suufik.