Read NQAARIIT NE ROOG Esayi 33 Bible Online

Esayi 33 - NQAARIIT NE ROOG bible

Esayi 33

¹Sabab took of, wo xe na yaqaa, too yaq’aandee, hodaa, too mosaandee o hod. O yaqangaa boo ƴut, xan o yaqel, o hodangaa boo ƴut, xan o hodel.

²O Yaal oxe, yirmi a in! Na wo i yaakaaru. Refi doole in nqes nuu refna fo a muc in itam yaa fa naqad fee.

³O ñuxur of a fangooxangaa, qeet ke kaa ƈufaa, o inooxangaa rek, a saax ake a pasaroox.

⁴Kalal ke den fop xan a ngifel nen kaa soƈ a nduudinna, a ngindrel nen ngindir tooroog.

⁵O Yaal oxe gartu fop took, yaam took a genu ten fa xoox um. Kaa mayƭandaa a Siyoŋ fo a ƭat fo o cofel.

⁶Xan a woornaa a pe of, a ref ndap halal a muc of fo o and fo o jeg-yiif. No saɗar o Yaal oxe halal Siyoŋ a refu.

⁷We ngenna Ari’el[34] owe njibnaa xa buuq kam ped ke, we na sakaa jam a loolaa ciic.

⁸A qal ake kaa mbootat, o leng reefatee na ƭat ake. Ngiɓoor ne a ɗege, seede we a nqeefel, too o leng niwataand.

⁹Lanq ke wey na ñaawax, a mbeeraa. Libaŋ kaa naag ɓot, a leeƥaa, Saron a nand nen o tan, Basan fa Karmel a nguytel.

¹⁰O Yaal oxe kaa tee: «Ndiiki koy, xam inoox. Ndiiki xam naag daket, lalit o magnel ole mi.

¹¹Yuuƥ ke nu mbofna boob rek a ndefu. A ndimange, a ndef fo gooñ doŋ. Haaƭ nuun xan a raaɓ a nuun nen fiɗel.

¹²Xan fiɗel le a dox qeet ke bo dee riw. Ƈulfaan ke xan a ndaaɓ a den nen taxas teɓe na fiɗel.

¹³Nuun we ngoƭna, nan-gilooxyo ke fi’uuma, nuun we matna, andyo doole es.

¹⁴Baabakaad we owe ndiidaa kam Siyoŋ, jofaƭaru we a sendaa, a ndamtin ee: ‹An na in na waagkaa o moof kam fiɗel le na raaɓaa? An na in na waagkaa o moof kam ƈulfaan ñufkeer ne?›

¹⁵Ten refu oxe na ñaaƴaa no cofel too a layaa ke refna a ƭat, a fañaa xaaliis fee jaɓteena o hup doole, a ŋook xa ƥay um, ndax dekkee nger, a sux nof um no we na sooban na pi a yednu, too ɗeetitkee paaxeer leng o ngid-o-nqoloos.

¹⁶Oxeene xan a gen no fo mbiñ ne took-ee-took, a ƥil a saƭku koŋ xan a ndef njaɓnooxand um. Xan a cooxel ñaamel boo ta dey sik, too foofi um daŋkee.»

¹⁷A kid of xan a naang jak fo o maad oxe kam o mosel um fop. Xan a nga saax yaaju le ne ta fodeena fop.

¹⁸Xan yiif of a gomaa diid le faafna soo o laamtooxaa yee: «Taa o koohorax oxe fo o taarabdinax juuti xe boog? Taa we limoogna taax-took ke?»

¹⁹Doonkatiro a ngid xeet feene na ƴaxooxaa, a layaa lak fa njan faa waagaandeena o and, a layaa fa lay ndiiƭ faa o leng a waageerna o dam.

²⁰Ɗeetangi a Siyoŋ, teeru fee qew ke in a ndoofandteel. A kid of xan a nga a Yeerusaleem, ngenand jam ne, ƭiif sekitkataand ne, a toodook ake a mbuurkataandeena muk, too xa ƥaak axe mbokitkataand.

²¹No ndigil, maaga o Yaal oxe a lalitkaa a in katil um. Xan a jeg maaga a ƈufnand fo xa quluɓ xa yaaju, maa a kaal xire ke a ndeefkateerna, too suk maak ke nqaañkatee maaga.

²²O Yaal oxe refu o Kaahate in, o ten na ɗoxaa a in. O Yaal oxe refu o Maad in, o ten na muclaa a in.

²³Yaa xa ƥaak axe wo[35] a yandkaa boo ndamkatee a maaw ale ta saƭik too letinkatee a laay a anddiloor, kalal mayu ke nqotteena na xire xan a lasrel. We na laƴaa sax xan a mbog na yaq fee.

²⁴O leng no we ngenna Yeerusaleem laykatee yee: «Kaam jir.» We ngenna teen a mbaasane pakaad den.