Read NQAARIIT NE ROOG Esayi 34 Bible Online

Esayi 34 - NQAARIIT NE ROOG bible

Esayi 34

¹Nuun a saax ake, matiidyo nan-giloox! Nuun qeet ke, naangyo tek! Fat lanq ke fop a nan-giloox, ten fo ke refna teen fop, adna fa muum fo ke saxna teen fop!

²O Yaal oxe a fuuxana a saax ake fop, too fuux um oxey took na yaj no xiixire den fop. Kaa kesan a den a saŋkax ale soo a ɓoxot a den xiixiris we.

³We mbareena na den kaa luuñaa a lanq, a qooñaan ale na xa tal axe a naang xun, soo fo’oy den a xayaa na xa coong axe.

⁴Katil ke ndefna na asamaan xan a ngef, asamaan fee a fokatoor nen a kayit a tore, soo juq le na xa qoor axe ten a yurdooxiid ne a naf ndaxar biiñ a yurdooraa, ne a naf ndun a ƥoorooraa.

⁵Laƥ ne mi kaa xeƴit na asamaan soo a fudooxaniidaa a Edoom, xeet fee kesanuuma a saŋkax ale, ndax um hate’in.

⁶Laƥ ne no Yaal oxe kaa siidaa fo fo’oy, a neƥaa fa neebam, ta ref fo’oy le no fo mbaal ne fo le na suk pambe ke, neebam fee na qisiil ake na suk paal ake, yaam o Yaal oxe a fi’ane sadax kam Bosra, a bar a ƭomu kam saax le Edoom.

⁷Naak-a-koƥ ke a yenandoora, den fo qoox ke fo sund ke. Lanq ke den kaa nqeƴ fo’oy, soo fo ut ole den a neƥaa fa neebam,

⁸yaam bes a tabdinax oo no Yaal oxe. O hiid ole Siyoŋ a rabdinooxankeel oo.

⁹A paas ake Edoom xan a suptoox godorong, fo ut ole ten a suptoox nqeen, soo lanq ke ten a nandat nen godorong faa na kaƥaa.

¹⁰Xan a kaƥaa ñaal fo o yeng, fo suun ole a naag kur, a yoɗoox boo kujumaani cay. Saax le xan a fes a pec no suk boo no suk, too o leng reefkatee teen boo muk.

¹¹Xan a refat ngenand a paɓaan ake fo a koƴ ake. A loy ake fo a tooq ake xan a ngen teen. O Yaal oxe xan a letin o ƥaak o liiƥir ole took um, ndax ta yoqnin o ƥor, soo a doon teen o ƥaak o fodrandir ole, ndax ta wootnin.

¹²Garmi fa leng refkatee teen, ndax ta dodel o maad, gelwaar we ten fop a ñuf ɗuƭ.

¹³Kol ke xan a maakaa kam pind no maad ke ten, poɗaafoɗ ke fo takar-ñiig ke a saxaa no pind mosu ke ten. Xan a ref ngenand xa ƥox-a-koƥ fo yongand a ba.

¹⁴A palmuus ake xan a nqetaa teen fo xa moon axe, a suk pambe-koƥ ake a mbokatooraa teen. Meene Lilit[36] a bugko ñootnooxaa too a jeg teen o laqooxand.

¹⁵Meene a bew ale[37] a raangkaa itam, a ɓoof teen, a ɓop a ƥoof um soo a woƈit a den no yook um. Meene a tud ake a mbugko mbokatooriidaa, aluu refna fo o yoon um.

¹⁶Nu mbaaƭangaa soo njang kam safe le no Yaal oxe, xan nu nga ee o leng na den yoqandee. Jegee fa leng faa xalatooxeena, yaam o Yaal oxe heblun a den, too Yiif um na fokataa a den.

¹⁷A banjanga a las no xuu refna na den. A xota o ƥaak o liiƥir um, ndax ta xaajrand a den saax le. Xan a njegin boo faw, too xan a ngen teen no suk boo no suk.