Read NQAARIIT NE ROOG Esayi 35 Bible Online

Esayi 35 - NQAARIIT NE ROOG bible

Esayi 35

¹A koƥ-a-ƥor ale fo lanq ke naangna koroŋ xan a mbelakinoox, o tan ole a fecoox soo a fiɗaa nen ngaaf-a-tooq.

²Xan a may fo piɗ mosu, a mbecoox fo o ɗaay, a mbelakinoox soo a soroxole. Xan a cooxel o ndam onqe Libaŋ fo o mosel ole no joong ole Karmel fa Saron. Xan a nga o ndam onqe no Yaal oxe, o mosel Roog in.

³Saƭkinyo xa ƥay axe nqijna, too ndifi kuɓay ke ngeesna.

⁴Layyo we a qeeñ den a njaqna yee: «Saƭakinooxyo, ba nu saɗar dara, yaam Roog nuun oxey a garaa, ndax ta rabdinoox, a ɓoxot oxuu refna a pi um. Oxe garaa, ten fa xoox um, ndax ta mucil a nuun.»

⁵Maaga, fuul we xan a nga’ataa a qool qac, nof ke no ram we a mbetoox,

⁶ɓoof we a mboolaa nen njaf, soo muum we a layataa fo o ɗaay. Xan poofi ke a mbal kam a koƥ-a-ƥor ale, soo a ƈufnand ake yee gañ kam o tan ole.

⁷Lanq ke na ndoxaa xan a suptoox a mbeel, soo a cur foofi ke a ndaxraa no saax le hoɗomeena. Xan xeet fo xa yiig a sax me xa ƥox-a-koƥ axe a mbondooxoogna.

⁸Xan a jeg maaga a qal a podrande, a ƭat alaa na bugko xoyeel a ƭat a tedu le. Oxaa xoolaƭarna reefkee teen. We ndefanna o Yaal oxe soom na njegkan. Fop we na nqotkan mo’kee, boo no ɗof we sax.

⁹Jegkee njogoy na ƭat aleene, too muumeen fa soxodu fa leng reefkee teen. Leng na den xetitkaand teen. We o Yaal oxe a watna rek na mbugko nqotan.

¹⁰Neene, we o Yaal oxe a wokitna xan a nomtooxiid, a mbadtiid a kim baneex kam Siyoŋ. O ɗaay o fagkeer xan a meleƈin mukit den, baneex fo o ɗaay a nqetiid fa den, soo naqad fo xa iin a ngoƭ a den.