Read NQAARIIT NE ROOG Esayi 36 Bible Online

Esayi 36 - NQAARIIT NE ROOG bible

Esayi 36

¹No hiid xarɓaxay fo hiid o nahkandeer ole no maat Hiskiya, Sanxerib fee o maad oxe Asuur a songa teeru cegu saŋe ke Yudaa fop soo a jaɓ a den.

²O maad oxe Asuur a foda Lakiis, a luliid a jawdiin um Yeerusaleem me no maad Hiskiya. A yoonandit’aan a yaj no xiixire, ta adooxan a den. A ndala paam a ƥaaxaand alaa no mbalka took naa na ƭat alaa no qol ole no qaaxaaɗ oxe.

³Maaga, Eliyakim fee o ƥiy Hilkiya, too a ref o aa-adax oxe no mbind no maad ne, a sutoora na teeru faa, a xetik fa jawdiin fee no maad oxe Asuur, a yoon fa Sebna fee o piibind oxe fa Yo’ax fee o keegeek cosaan oxe too a ref o ƥiy Asaf.

⁴Jawdiin fee a laya a den ee: «Ndetyo ndaawin a Hiskiya nduleer nene no maad o maak oxe refna o maad oxe Asuur na laamtan ee: ‹Xar refu a koolax aleene damlooxoona?

⁵Foogaa moos ee fa lay fa ƥor a waaga o ref o as fa doole fa nqire’ir. Ndiiki koy, an hoolooxo boo saɗ o siiknoor fa mi?

⁶Andaam ee yaakaariro dara a refangeerna Misira, jaj ɓolooxu leene na dibaa boo a yul o ɓay no xuu damlooxna teen. Neene mat Firawon fee o maad Misira a nandu no fop we ngoolooxuuna.

⁷Xeƈa xan o doonaam ee: O Yaal oxe Roog in i ngoolooxu. Kaa koy, andum refee yee Hiskiya ñufu a ñaang a sadaxand ake ten fo xa sadaxand axe ten, ye ta hebilna wiin we Yudaa fo we Yeerusaleem da ngungaa mbaambir o sadaxand ole na teeru fene soom.›

⁸Ndiiki koy, o yaal mbind of a jaɓangaa, fat a doon fo o yaal mbind es refna o maad oxe Asuur. Kaa ta layin ee: ‹Xam cooxong pis cuni ƭik, a soƥangaa yee waagaa o jeg ŋaaŋaay den.›

⁹Nam a waagkoogu o raxit o aa-adax o leng no we moƴna o ngees no dag we no yaal mbind es? Andaam ee kaa doon a koolax um na Misira, ndax ta jeg a sareet-xire fo ŋaaŋaay pis.

¹⁰Too sax, ndax kaa o yaal mbind es a fool a fool a song saax lene, ndax ta gefin, too o Yaal oxe yoonee teen? O Yaal oxe fa xoox um layun ee: ‹Songi saax lene too gefin tuƈ.› »

¹¹Eliyakim fa Sebna fa Yo’ax a laya a jawdiin fee yee: «Ko ndeeg, layi fa in, in we dag of no ɗelem araam, yaam i nanaan, too fañ o lay fa in no ɗelem hebre no nof na xeet fene ŋaayna no saŋe ne.»

¹²Jawdiin fee a doona yee: «Ndax me no yaal mbind of fo me wo soom o yaal mbind es a luliidaxam, um lay xa ƭelem axeene? Ndax refee me no wiin wene moofna took saŋe ne itam na ñaamkaa ndiiki ñaaƈlax den soo a yer a seed den fa nuun took o ñak pexey?»

¹³Cinj kaaga, jawdiin fee a leta soo a falaloox fa doole um fop no ɗelem hebre yee: «Nan-gilooxyo xa ƭelem axe no maad o maak oxe refna o maad oxe Asuur.

¹⁴Keeke o maad oxe a layu: ‹Baa Hiskiya a nax a nuun, yaam waagkee o mucil a nuun.

¹⁵Baa ɓisloox a nuun boo nu njeg a koolax no Yaal oxe, yaa ta layna a nuun ee: A woora yee xan o Yaal oxe a mucil a in, too teeru fene ɓoxotkaand na xa ƥay no maad oxe Asuur.›

¹⁶Ba nu nan-giloox a Hiskiya, yaam keeke o maad oxe Asuur a layu: ‹Njamsa’ooryo fa mi, ƥoxotoox na mi, too yaaga oxuu refna na nuun xan a ñaamaa o rim ole na ƭing taxar biiñ um fo o rim ole no ndun um, a yeraa foofi mband um itam,

¹⁷boo yaa um garkaa soo ɓis a nuun no saax laa nandna fo le nuun, no saax laa mayna bele fa biiñ, saax mayu ñaamel fo a ƭing taxar biiñ.

¹⁸Baa Hiskiya a naxit a nuun ee: O Yaal oxe xan a mucil a in. Ndax no roog ke na saax a lakas ake a jega teen faa mucilna saax um no ɓay no maad oxe Asuur?

¹⁹Taa roog ke no teeru ke Hamat fa Arpad? Taa roog ke Sefarwayim? Ndax a mucla a Samari na xa ƥay es?

²⁰A ndeer roog ke na saax akeene fop, fum na den muclu saax um no ɓay es? Nam o Yaal oxe a waagkaa o muclit a Yeerusaleem no ɓay es boog?› »

²¹We ndeeƭna maaga a naanga cel too ndooniran o ɗelem o leng sax, yaam o maad oxe kaa heblit’u yee: «Ba nu ndoonin dara.»

²²Eliyakim fee o ƥiy Hilkiya too a ref o aa-adax oxe no mbind no maad ne fa Sebna fee o piibind oxe fa Yo’ax fee o keegeek cosaan oxe too a ref o ƥiy Asaf a mbaara toki den, a ngar me Hiskiya soo a ndaawnin xa ƭelem axe na jawdiin fee no maad oxe Asuur.