Read NQAARIIT NE ROOG Esayi 37 Bible Online

Esayi 37 - NQAARIIT NE ROOG bible

Esayi 37

¹Yaa o maad Hiskiya a yegna kaaga, a dalfooxa o faar toki um, a deroox o saaku soo a ret no Mbind naa no Yaal oxe.

²Cinj kaaga, a hebla a Eliyakim fee reeƭna o aa-adax oxe no mbind no maad ne fa Sebna fee o piibind oxe fo maak we no saasadax we nderoox’ina xa saaku, da ndet maa Esayi fee o ƥiy Amoc.

³Weene a laya a Esayi yee: «Keeke Hiskiya a layu: ‹Bes fene, bes naqad fo a qaw fa gaci a refu, ne ta layteel ee: Xa qeq axe mbudeena a mbade o ñoot, ndaa doole fa ñootir jegee.

⁴Giimee o Yaal oxe Roog of a nan’angaa rek xa ƭelem axe na jawdiin fee o maad oxe Asuur refna o yaal mbind um a lulitna, ndax ta wen a Roog fa ñoow jok fee, yaaga xeƈa xan a fadin a qaw um yaam xa ƭelem axe ta nanna. Xeɗani boog onqe yoqna na xeet um.› »

⁵Yaa we o maad Hiskiya a lul’ina a mbadiidna me Esayi,

⁶oxeene a laya a den ee: «Keeke um laykaa o yaal mbind nuun: O Yaal oxe kaa tee: ‹Baa xa ƭelem axe nanoona too xa yoot axe no maad oxe Asuur a mbentaam a den a ndiidlandong.

⁷O maad oxe xan a daaw o nan, too xam ɓek no ten yiif laa na riñkan ta nomtoox no saax um, soo um warnoorin maaga fo laƥ.› »

⁸Jawdiin fee no maad oxe Asuur a nana yee o yaal mbind um a inoora Lakiis, ndax ta songik a Libna, soo ta soƥkin maaga.

⁹Ɓaatnee dara, o maad oxe Asuur a yegnel ee Tirhaka fee o maad Kuus oxey na ƭat, ndax ta xire fo ten. Yaa ta nanna kaaga rek, a dalfooxa o lul wiin maa Hiskiya, a lay a den ee:

¹⁰«Fat nu lay a Hiskiya fee o maad Yudaa kene: ‹Baa Roog of fee hoolooxoona a naxtong ee: Yeerusaleem ɓoxotkaand na xa ƥay no maad oxe Asuur.

¹¹Wo fa xoox of nanoodaa ke maad we Asuur a mbi’na a saax ake fop. A ngefa a den tuƈ, soo wo o foog ee xan o muclel.

¹²Ye daan es a yaqaa a Gosaan fa Xaraan fa Retsef fo Ee-edeen we ndeeƭna Telasaar, ndax roog ke no teeru keene a mucil’a a den?

¹³Taa o maad oxe Hamat fo xe Arpad fo xe na teeru fee Sefarwayim fo xe Hena fo xe Iwa?› »

¹⁴Hiskiya a xotta o leetar ole no ɓay no we lul’eena soo a jangin. Cinj kaaga, a reta no Mbind naa no Yaal oxe, a dortin mbaambir no Yaal oxe.

¹⁵Maaga, a xeɗa mbaambir no Yaal oxe yee:

¹⁶«O Yaal oxe Hupna fop, wo Roog fee Isra’el, wo fee pindel yeeyetax ke a ndeegooxna uum-maamaad le wo, wo soom refu Roog fee no maat ke na adna fee fop, too wo saku asamaan fo lanq.

¹⁷O Yaal oxe, rungi nof of, wet a kid of, ɗeet too nan-giloox xa ñuxur axe Sanxerib a lulitna, ndax ta wentong a den, wo fee refna Roog fa ñoow jok fee.

¹⁸O Yaal oxe, ndigil oo, maad we Asuur a nduguña qeet ke fop fo a saax den

¹⁹soo a ndeɓ roog ke na saax akeene na fiɗel. Kaa ndeeƭee roog tiindigil, ndax a ndef soom xa taaƴ a qanq fo a ƥil axaa wiin we a njalna. Ten tax’u boo da mbaag o yaq a den.

²⁰Ndiiki koy, wo o Yaal oxe Roog in, mucli a in no ɓay Sanxerib, ndax maat ke na adna fee fop a and ee wo o Yaal oxe, wo soom refu Roog.»

²¹Maaga, Esayi fee o ƥiy Amoc a lulta maa Hiskiya yee: «O Yaal oxe Roog fee Isra’el kaa tee: Nanaam a qeƭ ale diisaxamoona no kaa farna na Sanxerib fee o maad oxe Asuur.

²²Nan-gilooxi xa ƭelem axe layuuma no kaa jofna no ten: Siyoŋ, o njaaƈ o ndoog onqe kaa xeefong, a xaadnooxang, Yeerusaleem fa mosaan fee a jalang, a wulaa xoox.

²³An wenoogo soo tooñan? An ŋaloogo? Kaa o fooraam a kid, mi o Tedu xe Isra’el.

²⁴Wenaxamo, mi o Yaal oxe, reefandin no we luloona, soo lay ee: ‹Mi Sanxerib, ŋaayaam xa cul axe na xa coong axe fo a sareet-xire mayaan ake mi, ret boo kam ee kam Libaŋ, ndax um fuuɓ taxar seedar ciig ke ten fo pilaawo ke ten moƴna o mos. Daawaam o jul ole ten moƴna o goƭ took fo suungaan le ten na nandtaa a ƭing.

²⁵Mi fa xoox es waqaam kas, soo yer foofi den. O jaf es ŋiisandtum xa quluɓ axe Misira fop.›

²⁶Ndax andiro yee mi yuuɓ’u keene yaaga, ɗaapin no camaane miñu kaa? Ndiiki koy, kaam fadnan rek. Wo jagand’um, ndax o gef teeru cegu saŋe ke, yaq a den pic.

²⁷We ngenna a den njeg’ee o njembe, a ndiid soo a sed. Kaa nand’u fo daaƭ le na xa saawit axe fo suuƴin le na xa suufand axe, a nand itam fo tuufe-duufe took bomb kaa nqeñ ne no batand ne a leeƥinna.

²⁸Ta soƥ ee kaa o inoox mbaat o moof, o retaa mbaat o garaa, andaanum, nen yaa fuuxanaxamoona itam.

²⁹Ne fuuxanaxamoona, soo a magnandax of a nannoox no nof es, xam rokong o heɗ no ñis fo a laxaaɓ no don soo nomtong cook no mbind of, o xotatin a ƭat ale garit’oona garit.

³⁰Wo Hiskiya, keeke xan a refanong o anddiloor: Rend bele fa malu rek nu ñaamkaa, mbaand itam neen, ndaa mbaand-a-tiit nu mbaaga o nduuf too saxad bele nuun, nqoox a ƭing taxar biiñ nuun soo muudoor xa tim axe.

³¹Yoqatin we mucna no maat ne Yudaa xan a ndefatin nen ndaxar naa a paƴ ake a ƭuuɗooxaa kam lanq ke, soo a naaq um a njof took, a ndim boo a ƭooqaa.

³²Ii, xan xeet a hat no yoqatin we Yeerusaleem, a inoor no we mucna no joong ole Siyoŋ. Keene o Yaal oxe Hupna fop a fi’kaa kam o mbeq o naalu nqe ten.

³³Ndiiki koy, keeke o Yaal oxe a layu no kaa jofna no maad oxe Asuur: ‹Rokkee na teeru fene. Xaƴkee teen a kas. Songkiran, a saq pegoor, too yoɗankiran a ƈoong.

³⁴Xan a naag cook a nomtoox, a xotatin a ƭat ale ta garit’ina garit. Rokkee na teeru fene muk. Mi layun, mi o Yaal oxe.

³⁵Xam saytoox a Yeerusaleem soo muclin yaam o niwel es fo ke reguuma a Dawid fee o tag es.› »

³⁶Malaaka no Yaal oxe a roka no saŋe ne no Aa-asuur we soo a war na den goor cuni teemeed fo goor cuni qarɓeen ɓetuu tadik fo goor cuni ƥetik. No feet nqes olaa, yaa waa nqon’eerna a yokooxna, a nga’a xa tal axeene fop.

³⁷Maaga, Sanxerib fee o maad no Aa-asuur we a simta saŋe ne a ɗisel, soo ta xotatin a ƭat, a nomtoox no saax um, a moof Niniif.

³⁸Bes, a jopir ta xeɗaa no faɗoorand olaa Nisrok fee ta fi’’ina roog um, ɗik na xa ƥiy axe ten ndefna Adaramelek fa Sareseer a mbartaan laƥ, cinj kaaga, da ƈuf no saax laa Araraat. O ƥeem o lakas onqaa ne’’eena Esar-Hadon a rondandaan.