Read NQAARIIT NE ROOG Esayi 38 Bible Online

Esayi 38 - NQAARIIT NE ROOG bible

Esayi 38

¹Na jamaane faaga, o maad Hiskiya a jira boo a ref ndeer xon fo ñoow. O tuleer Esayi fee o ƥiy Amoc a gara me ten, a layin ee: «O Yaal oxe kaa tee: ‹Regdinooxi mbind of, yaam wodkatiro, ndaa xan o xon.› »

²Hiskiya a geleerooxa farna fo tabax ne soo a xeɗ o Yaal oxe.

³Kaa layoogu yee: «Ey, o Yaal oxe, wetandooxi yee ñaaƴaam mbaambir of fo ngor fo kam fa letu, too ke feloonga rek fi’oogum.» Cinj kaaga, xa kooniit um a yuura, ta naag ɓusiid a lool.

⁴Maaga, o Yaal oxe a hebla a Esayi,

⁵ndax ta lay a Hiskiya yee: «Keeke o Yaal oxe refna Roog fee no taan of Dawid a layu: ‹Nanaam a qeƭ of too ga’aam xa kooniit of. Ndiiki koy, xam ɓaat no ñoow of xa kiid xarɓaxay fo xa kiid xa ƥetaq.

⁶Xam muclong, wo fo we ngenna Yeerusaleem na xa ƥay axe no maad oxe Asuur, too xam saytoox teeru fee.[38]› »

⁷Esayi a ɓaata o lay ee: «Keeke refu o anddiloor ole o Yaal oxe a cooxkang, ndax ta woornong ee xan a fadin ke ta regitna:

⁸took o toŋ-toŋ ole Ahas reeƭna no njeeƈ ne, too yook ne a muuratin, xan o Yaal oxe a riƈat yook ne boo a taaraand xarɓaxay.» Naaga deŋ, njeeƈ ne a nomtooxa took a taaraand xarɓaxay ake no toŋ-toŋ ole yook ne a muur’atna.

⁹Keeke refu a kim ale o maad Hiskiya a ferna a cinj ye ta jirna boo a wod:

¹⁰«Kaam layoogu yee: Mexey foda na doole es tigi soo war o xaad jaaniif neeke haat! Ke yoqɗoor’eema na xa kiid es kaa xuufel.

¹¹Kaam layoogahinu yee: Ga’katiim muk o Yaal oxe took lanq ke no ñoow we mbaat o mbindeef o leng no we ngenna na adna fee.

¹²Ngenand es kaa baytel nen ƭiif no kaynaak, a joorel maa goƭaxama. Kaam dor o ñoow es nen o tiiriw a tiwand oxaa muukna o eed um boo a ɗegiidaa xa ƥaak axe. O Yaal oxe, no ñaal ne fop kaa o ñaatnoogaam,

¹³ndaa yaqanee um muñin boo neen roog a feedu. O Yaal oxe a mokanda xa kiiƈ es nen njogoy. O Yaal oxe, no ñaal ne fop kaa o ñaatnoogaam.

¹⁴Kaam cococaa nen o helaar-roog, soo cuuc-cuucnaa nen a nuukuur. Kaam ɗeet farna fa asamaan boo a kid es a ƭangat. O Yaal oxe, kaam torox. Gari dimle’aam!

¹⁵Ndi xar um laykataa? A jaaɓaxam soo a jaɓ a qeƭ es. No ñoow o ñis es fop xam ñaaƴataa fo a neewandax, a cinj ye ɓeeruuma no coono keene.

¹⁶O Yaal oxe, o paaxel of taxu o kiin a ñoowaa. O nanangaa um maad o haaƭaa, o paaxel of gartun. Wo na ci’axam doole, ñoownaxam.

¹⁷Xeeñ feƭaru es a jegata jam. Kaa o fexaam boo suudit o laaw es no gamb le na saŋkax ale, yaam deɓaa a cinj of pakaad es fop.

¹⁸Jaaniif simatkirang, fa nqon tagaskirang. We ndefna no poy kaa njegatee yaakaar na wo.

¹⁹Ñoow we soom na simatang nen a mi xaye. Faap fee kaa andnooraa xa ƥeem ngor ne wo.

²⁰O Yaal oxe a muclaxam! No ñoow in fop, fat i njibnaa fo nqilimb in ñaal oo ñaal kam Mbind ne no Yaal oxe.»

²¹Esayi a laya yee: «Fat o ɗok xa tun a ɓisiidel, a ɗuumel no ɗoy le, too yaaga xan o maad oxe a wod.»

²²Maaga, Hiskiya a laamta yee: «O anddiloor olum na woorinkaxam ee xam waag o retahin no Mbind naa no Yaal oxe?»