Read NQAARIIT NE ROOG Esayi 42 Bible Online

Esayi 42 - NQAARIIT NE ROOG bible

Esayi 42

¹«O tag es oxe um ci’aa a caf oxey. O ten jilum, too no ten o laaw es a felakinoortu. Kaam fudin Yiif es took um, ta ɓisiidaa qeet ke o cofel.

²Wuuqkee, falalooxkee, too o leng nankee o ñuxur um kam ped ke.

³Patkee o siind ole ɓolooxna, too ñufkee o jam ole na ƥoñaa. Xan a ñaaƴin o cofel no ndigil.

⁴Ƥoñkee too patooxkee boo yaa ta dalinkaa o cofel na adna fee. A pimb ake kaa cungaa a cangin um.»

⁵Roog o Yaal oxe sakna a asamaan fo o yaajel um, a fiis lanq ke fo ke saxna teen fop, a coox xeet fee ngenna teen haaƭ, a ci yiif fop we na ñaaƴaa teen, kaa tee:

⁶«Mi o Yaal oxe, kaam xoyong no cofel soo damong no ɓay. Kaam saytooxang soo dalnong, ndax o ref ngiɓoor ne mi fo qeet ke, ref a qoolaand ale na saax ake.

⁷Xan o wet a kid no we mbuulna, wat we ndameena, soo we ngenna no niɓaan ole, o sut a den no ngupuus onqe da ndefna.

⁸Mi refu o Yaal oxe. Keene refu gon es. Xaƴankiim o lakas o ndam onqe helaxama, too xaƴkiim fo pangool ke o niwel ole jagirna fa mi.

⁹Ke yegnit’eena yaaga a fadnooxa. Ndiiki, qas um yegnitataa, too kaam andnooran a nuun yaaga xewafulee.»

¹⁰Ngimanyo o Yaal oxe a kim a qas. Simatteenoo no ke xotitna no cat adna, wo o maag ole, fo nuun ñaañaaƴ we teen, nuun a pimb ake fo we ngenna teen.

¹¹Fat a koƥ-a-ƥor ale fo teeru ke ndefna teen a yoɗ a kim, fo njaate ne Kedaar[41] a genna itam neen! Fat we ngenna Sela a soroxole! Fat a njibnit xa ƈeel no jul ole na xa coong axe.

¹²Fat we ngenna na pimb ake a ƥoxot o Yaal oxe o ndam soo a simatin fa doole.

¹³O Yaal oxe xe ɓeriidaa nen a salma-koor, a fapooxan a ñoq ale nen o qiixire soo a jibin o wuuq xire o jegu doole, a maaf fañ um.

¹⁴O Yaal oxe kaa tee: «Yaaga boo fa ndiik, kaam maar o don es, dam njaambuur es, fañ o fesoor dara. Kaa koy, ndiiki kaam wuuqaa, haƈaa soo suxaa nen o tew oxaa na gaajooxaa.

¹⁵Xam fiitin xa coong axe fo loot ke boo da naang halit, soo weerin fop ke na xuƥaa na den. Xam supit xa quluɓ axe lanq beeru soo ŋiisin peel ke.

¹⁶Xam ñaaƴnoor fuul we na ƭat alaa da and’eerna, ɗox a den na qal akaa da mos’eerna o ndeef. Xam suptan a den o niɓaan ole a qoolaand, soo a qalnqaluuƈ ake, um fodrand a den. Keene refu ke um fadinkaa, too dakooxkiim teen a cinj.

¹⁷We ndoonna a koolax den no pangool ke fo we na layaa xa taaƴ xa qawne xe yee: ‹Nuun ndefu roog ke in›, xan a ndakoox o jiijing, a ngac’andel.»

¹⁸«Nuun ram we, nan-gilooxyo a paax! Nuun fuul we, mbetyo a kid nuun, ƭeet.

¹⁹An fuulu, a refangee o tag es? An ramu nen o tuleer oxe hebluuma? Iyo, an fuulu nen oxe na jo’tanaxam, an ramu nen o tag oxe no Yaal oxe?

²⁰Ga’aa tig mayu, ndaa damiro teen dara. Nof of a mbetooxa, ndaa naniro tus.

²¹Kam o cofel um kaa fel o Yaal oxe ta dalin kebil um da magin too a njeg o ndam.

²²Kaa koy, xeet feene kaa ngefel soo a nguytel. Den fop kaa ƥiikil’el na kamb soo a mbegel kaso. Kaa ngef’el, too o leng muclee a den, a ngifel, too o leng waagee o lay ee: ‹Ndaknaamoo a den.›

²³An na nuun na rungkaa nof um no tig keene? An na fogooxkaa, ndax ta waajan ke na garaa?»

²⁴An ɓoxotu a Isra’el we nguytooguuna, kaam ee an ɓoxotu a Yakoob we ngefooguuna? Andum refee o Yaal oxe i tooñna. O leng na den bug’ee o reef a ƭat ale Roog um a xalanuuna, too nan-gilooxee a cangin um.

²⁵Ten taxu o Yaal oxe a fudin took xeet um fuux ɗomu le ten fa xire fa ƭomu. Ƈulfaan kaa mbidin muu refna, ndaa taxee ta and, o dox ole a daawin, ndaa haaliran.