Read NQAARIIT NE ROOG Esayi 45 Bible Online

Esayi 45 - NQAARIIT NE ROOG bible

Esayi 45

¹Keeke o Yaal oxe a layu a Kiirus fee ta ɗuumna: «Xam damong no ɓay o ñamaak, ndax o maaf a saax ake, jaɓ sañ-sañ ke no maad we, soo daƈit a kinglir ake no begax ke no teeru ke mbodna mbaambir of.

²Mi fa xoox es xam adooxanong, fodrand a qalnqaluuƈ ake. Xam daƈit begax xanjar ke, soo yaq a kinglir a celem ake boo pic.

³Xam ci’ong kalal ke laqeena no niɓaan ole fo o jeg ole ɗasneena a paax, ndax o and ee mi refu o Yaal oxe Roog fee Isra’el, xoyoonga no gon of.

⁴Xoyaaxoong no gon of soo ci’ong tedaanga yaam Yakoob fee o tag es, yaam Isra’el fee jiluuma, ke and’eeraxamoona fop oo.

⁵Mi refu o Yaal oxe, too jegee o lakas. Jegee roog fa lakas faa jolna mi. Ke and’eeraxamoona fop oo, yaqanee um fapong.

⁶Neene, xan ke xotitna no batand boo a sip no mudand a and ee kaa jolaxama jegee dara. Mi refu o Yaal oxe, too jegee o lakas.

⁷Mi na fi’aa a qoolaand soo sak o niɓaan. Mi na ɓisiidaa baneex soo oraa naqad. Mi o Yaal oxe, mi na fi’aa keene fop.

⁸Fat asamaan fee a deɓiid, a eel ake a mbudin o cofel. Fat duufe le a yoɗ ɗak, o rim ole na muc ale a sax, o cofel ole a jol. Mi saku keene, mi o Yaal oxe.»

⁹«Sabab took no xe refna o jalag a ndeer xa calag xa maxte ƭok, soo a saɗ o xasanaa oxe maxuuna! Ndax ƭok a naaga o layaa o maamax oxe yee: ‹Xar o fi’aa kene?› Ndax nqaw a naaga o layaa oxe maxuuna yee: ‹Wo cuune’u!›

¹⁰Sabab took no xe na layaa a faap um ee: ‹Xar taxu o axaam?› mbaat a ya um ee: ‹Xar taxu o rimaam?› »

¹¹O Yaal oxe refna o Tedu xe Isra’el, ten oxe sakna xeet um, kaa laamtaa ndiiki yee: «Ndax mi o mat nu mbugu o laamit no kaa farna na xa ƥees, soo cooxaam bargal no ke waruuma o fi?

¹²Yaag oo toox de, mi fiisu lanq ke soo sak pindeef ke ngenna teen. Mi letnu asamaan fee soo kelfa a yaj ake ten fop.

¹³Kam o cofel es, mi hebliidu oxeene nu andna. No kuu ta rokna, xam yooɓandanin o ten. Ten na maxatinkaa a Yeerusaleem fee teeru es, a xaƴ wiin es we ndameena mbaƭ da nqaad, too laamitkee a bateer den mbaat nger.» Keene o Yaal oxe Hupna fop a layu.

¹⁴Wo Isra’el, keeke o Yaal oxe a layong: «Kalal ke no Miimisira we fo ke Kuukuus we a njegtaa no cula ke den fo Seeseeba we na nandtaa tof caang xan a mbod no ɓay of, soo o jegat a den. Qeet keene xan a ndeefang, a ñaaƴtaa a ceng. Xan a ngungaa mbaambir of, a nqeɗooxang, a ndamtin ee: ‹Me wo soom Roog a refu. Jegee roog fa lakas, a refangee ten.› »

¹⁵Wo Roog fee Isra’el na muclaa, no ndigil Roog fa kunpa’u refo.

¹⁶Ɗeeti, seesex pangool we wey ɓot soo a maas ƴam. Den oo weene ndetaa, a yoorin a qoox yaam gaci.

¹⁷Kaa koy, o Yaal oxe xan a mucil xeet fee Isra’el. Xan a muclel boo faw. Nu sedkee muk mbaat nu niwaƭarel.

¹⁸O Yaal oxe saku asamaan fee, ten refu Roog fa leng kut fee fiisna lanq ke, a sip a den soo a saƭkand a den koŋ. Sakee a den koy, ndax da yoq o ƥor, ndaa ndax da ngenel. Ndiiki keeke a layu: «Mi refu o Yaal oxe. Jegee roog fa lakas.

¹⁹Layiim na pet, no mbiñ onqaa niɓaanna tit. Simiim xa taan axe Yakoob itam da mbaaƭaxam maa dara refeerna. Mi o Yaal oxe, booru um layaa. Ke um yegnitaa kaa xool qac, too no ɓil laa a godu.»

²⁰«Mbokatooryo too ngar. Matiidyo nuun fop, nuun we ƥostooxna ndeer a saax ake. Dara refee na qoox no we na ƥislooxaa pangool kaa ndefna a teex, a ƈufginooxaa a roog faa waageerna o mucil.

²¹Nga’iryo a ndeer nuun, yegnitin soo lambnin. An yegnit’u yaaga ke na xewaa ndiiki? Mee ndax mi o Yaal oxe yoo! Jegee roog fa lakas faa jolna mi, roog fa njofu faa na muclaa jegee, a refangee mi.

²²Nuun we ngenna no cat adna, ngeleerooxyo me mi too njaɓ o muclel, yaam mi refu Roog, too jegee fa lakas.

²³Daaɓoortaanum a xoox es, too fa lay es ndigil kak oo, dara teen suptooxkee: ‹Xan wiin we fop a ngooknoox mbaambir es, o don oluu refna a weejil ee

²⁴na mi o Yaal oxe soom o cofel fa doole a ndefu.› » Fop we siiknoor’ina fo ten xan a nomtooxiid me ten, a lupandoox yaam gaci.

²⁵No Yaal oxe xa taan axe Isra’el fop a ndaawitkaa o cofel soo a mbakoox.