Read NQAARIIT NE ROOG Esayi 46 Bible Online

Esayi 46 - NQAARIIT NE ROOG bible

Esayi 46

¹Bel[43] a gooknooxa, Nebo a lomoƴoox. Xa taaƴ den a sufe took cegel, took cegel meɗe dis. Ke nu yoɗoogna took kaa refat a toq a meɗu no cegel keene nqijna laƈ.

²Roog keene kaa lomoƴooxaa soo a ngooknoox, too mbaagee o mucil suf ne no cegel keene. Den fa qoox den no mbaƭ a njofaa.

³Nan-gilooxaamoo, nuun mbind Yakoob, nuun yoqatin we na xeet fee Isra’el, nuun we teeteeluuma yaaga nu numaa, gadoox a nuun yaaga nu sogeel o ndim.

⁴O leng kut oxe um refkaa ref boo yaa nu nogoykaa. Xam damtaa a nuun boo yaa nu mbuumkaa taw. Ne fi’tanuuma, xam maad o yoɗaa a nuun, gadoox a nuun soo mucil a nuun.

⁵«An nu nandanditkaxam soo ndendandtaam o ten? An nu mbodranditkaxam ndax i nand?

⁶A jega waa na mbaltaa nafa den, a eedaa xaaliis fee fa wurus fee, a ndabid o qaaxaw ndax ta xawan a den a roog faa da mbugko mbaɗooxaa, a ngungaa mbaambir um.

⁷Cinj kaaga, da nqotin, a ngadooxin soo a ndiƈin na seek um. Maaga roog fee a yoqaa, riƈatooxkee sen. A xoyange sax oo, jaaɓkee too mucilkee o leng na naqad.

⁸Mbetandooxyo kene too ndef goor. Nuun gore’aƭaru we, ƭeetaqinooxyo a paax.

⁹Mbetandooxyo cosaan fee nuun no miñu kaa. Mi refu Roog, jegee fa lakas. Mi refu Roog, too jegee faa nandna fa mi.

¹⁰Yegnitaam no mberaand naa ke na xewkaa, lambin yaaga ke fadiidafuleerna. Kaam layaa yee: Yuuƥ es xan a fadnoox, too ke buguuma fop, kaam fi’an.

¹¹Xoytaam a canjiik no batand. Kaam ee xoytaam no saax goƭu leene o koor oxe na fadinkaa yuuƥ ke mi. Kuu layuuma xam fi’in, too kuu yuuɓuuma xam fadnin.

¹²Nuun we neegna, too nu matee maa o cofel a farna, nan-gilooxaamoo.

¹³Mexey matandiidaa o cofel es, goƭatee sax. A muc es ñaalkaand a kar. Mexe ɓisiidaa kam Siyoŋ a muc es. Kaam ee mexe ɓisiidaa a Isra’el tig mosu.»