Read NQAARIIT NE ROOG Esayi 49 Bible Online

Esayi 49 - NQAARIIT NE ROOG bible

Esayi 49

¹Nuun we ngenna na pimb ake, nan-gilooxaamoo, nuun qeet ke ngoƭna, ndungyo nof nuun! O Yaal oxe kaa xoyaam yaaga rimaandeem, a ne’aam gon no fud ya es.

²Kaa fi fa lay es laƥ mbeelu, soo a laqaxam yoora o ɓay um. Kaa fi’aam nen a kas a lake laa ta ɓekna na tungaar um.

³Kaa layaam ee: «Wo refu o tag es, Isra’el fee um jiriiñooraa, oxe um feeñlitaa o ndam es.»

⁴Mi o mat kaam xalaatoogu yee: «Ke xijuuma fop kasaara yoo, too doole es, kaam ɓaxin na xa koɓong fo na xa andand xa ƥor. Kaa koy, refee naaga. A woora yee o Yaal oxe saqu wargal es, too Roog es pokooxu saɗig es.»

⁵O Yaal oxe a ga’a o njiriiñ es, Roog es refu doole es. Ndiiki koy, o Yaal oxe moolaxama yaaga rimafulaandeem, ndax um ref o tag um, soo nomtiid xa taan axe Yakoob me ten, fokat xeet fee Isra’el paam um,

⁶kaa tee: «O ref o tag es, ndax o inatin a carind ake Yakoob soo nomtiid yoqatin we Isra’el, deyee na wo. Kaam dodong a qoolaand no qeet ke, ndax a muc es a xay boo no cat adna.»

⁷Keeke o Yaal oxe refna o baawat oxe fo o Tedu xe Isra’el a layu oxe o ñoow um a sibeena, too wiin we a sibdin, a ref o paɗ no yaal toole ke: «Xan maad we a nga’in too xan a inoox, xan gelwaar we a ngung mbaambir um, yaa da ƈookkan. Neene, xan a lalit ee a niwa o Yaal oxe gore’na, a ref o Tedu xe Isra’el jiloonga.»

⁸O Yaal oxe kaa tee: «Na jamaane fa mbaax fee nan-gilooxaaxoong, na bes fee na muc ale um ƴufgong. Kaam jagandong soo dalnong, ndax o ref ngiɓoor ne mi fo qeet ke, inatin lanq ke, lasit lam ke yaakaar’ataandeena,

⁹lay we ndameena yee: ‹Sutooxyo!›, soo we ndefna no niɓaan ole, o lay a den ee: ‹Mbeeñyo!› Xan a mbaag o suuf kam a ƭat ale too xan a njeg xa suufand na xa coong axe naangna halit.

¹⁰Nqeexkataand too ngoɗomkataand, mbooyo ne mbaat njeeƈ ne ñaatlandkatee a den, yaam oxe yirimna a den na refkaa o kaynaak den, too xan a ɓakand a den na cur foofi.

¹¹Xam supit xa coong axe a ƭat a teefel a qal ake mi a ndefat took.

¹²Den oo weene na mbadiidaa, koƭu a nomtoortiidu, wene no ɓemb-roog o janoon, waana no mudand, weeke no saax laa Siniim.[44]»

¹³Wo asamaan, lalti o ɗaay of, lanq ke, mbelakinooxyo, nuun xa coong axe, mbecooxyo fo xa ƈeel, yaam o Yaal oxe xe yaalaa xeet um, soo a yirmaa toroxu we ten.

¹⁴Siyoŋ kaa layaa yee: «O Yaal oxe a waasaxam pelek, o Yaal es a weecaxam.»

¹⁵Kaa koy o Yaal oxe a doona yee: «Ndax o tew a waaga o weec o njaaƈ onqe ta numnaa? Ndax a waaga moof boo a fañ o njaaƈ onqe ta waxooxaa? A weecangaan sax oo, mi weeckiroong.

¹⁶Kaam bindong no dang o ɓay es, a kid es a ngaan no saŋe ke wo.

¹⁷We na maxatinkang owe ñof o ngaraa, soo we ngefoogoonga, a mbaytang, a ndiƈatooxang.

¹⁸Deɓi a kid of me widoonga too horoox a paax. Fop owe mbokatoora, a ngaraa me wo. Ne ta wooritna yee mexe ñoowaa, mi o Yaal oxe, neene a woortu yee xan a ndef na wo nen kumooxel kaa na mosandooreel. Xan o hiɓoor fa den ne o kulook a rokoortaa ceq um.

¹⁹Te paam o ndik rek, yaqe le wo fo xa kenand axe wo ngefeena tuƈ fo saax le wo fesna a pec, xan a mbiiqat lool no we ngenna teen, soo koy, we mbiitin’oonga a ngoƭong.

²⁰Kaa o foog’u yee ñakaa xa ƥeef, ndaa xan o nanahin a den da layraa yee: ‹Xeƈiim, riƈatooxi o ndik boog, ndax mi itam um waag o gen!›

²¹Maaga, xan o laamtooxaa yee: ‹An ci’axam xa teɓandoong axene fop? Kaam ñak’u xa teɓandoong axe mi too yaakaar’atiim o jeg xa lakas, laqoox’u soo kesel. Ndi wene o mat, an yaru a den? Kaam yoq’u koƭong, soo wene mam a inooru boog?› »

²²Kene o Yaal oxe na refkaa boo faw a layu: «Xam cax a saax ake, sipan qeet ke a laay a anddiloor, too xan a nomtiid xa ƥeef xa koor axe, a ngadoox a den, a nduxloox xa ƥeef xa tew axe, a nomtiid a den.

²³Xan o jeg lingeer kaa na numnanang xa teɓandoong of fo maad waa na saqkaa a den. Xan a ngung mbaambir of, a metaa fo ut ole na caf of. Maaga, xan o and ee mi refu o Yaal oxe, too we yaakaaraxama sedkee muk.»

²⁴Ndax ke a salma-koor ale a xotitna na xire a waage o jaɓ? Ndax oxe poŋkil a damna mbaƭ xan a suqtel no ɓay um?

²⁵O Yaal oxe kaa tee: «Aha kañ! Xam jaɓit na salma-koor ale oxe ta fi’na o paɗ soo suqtit na poŋkil fee kalal ke ta xotitna na xire. Wo Yeerusaleem, mi fa xoox es xam damir fo we na ndaawraa fa wo soo mucil xa ƥeef.

²⁶Xam ñaamnoor we na ñagadilang cer a qoox den, da mbay nep fo fo’oy a qoox den ne biiñ fa nqas a waynitaa. Maaga, mbindeef nuu na ñoowaa xan a and ee mi o Yaal oxe, mi refu o Muumucil of fo o baawat of, mi o Cegu doole xe Yakoob.»