Read NQAARIIT NE ROOG Esayi 5 Bible Online

Esayi 5 - NQAARIIT NE ROOG bible

Esayi 5

¹Xam giman a xaariit es a kim ale no xe fexuuma fex fo a ƭing taxar biiñ um. Xaariit es kaa jeg’u a ƭing taxar biiñ no mbiñ o njaɓu taxar, a xaaɗ bo.

²A jiqta lanq ke maaga, a watin a kac ake soo a jimb teen taxar biiñ pelu. A maxa a ndeer ee ndeer ale o yetooxand soo a waq kam faa o nirir. Kaa yaakaaroogu yee a ƭing ale xan a rim xa tim biiñ xa safu, ndaa koy, ke ta rimna jaɓee no don.

³E ndiiki koy, nuun we ngenna Yeerusaleem fo nuun wiin we Yudaa, nuun na ngate’kaa a ndeer es fo a ƭing ale mi!

⁴Ndax waag’aanum o fi’an kupu ke fi’uuma? Mexey yaakaarooga o jegit teen xa tim biiñ xa safu, soo ta dek a rimik kaa jaɓeerna no don.

⁵Ndiiki koy, xam lay a nuun deŋ ne um fi’kaa a ƭing ale mi: Xam bayit o ɗiiɗing ole, ndax ta fiitnel, maaf ɓit le, ndax ta duutel.

⁶Xam xaƴin ta ñar. Calaskataand mbaat ta xooxel, tomb fo takar-ñiig xan a saxik teen, too xam xañit a eel ake da ndeɓ took um.

⁷Isra’el refu a ƭing taxar biiñ ale no Yaal oxe Hupna fop, soo wiin we Yudaa a ndef ndaxar biiñ ne ta jimbna fo o ɗaay. O Yaal oxe kaa yaakaaroogu yee xan a ndeefaa a ƭat, ndaa koy, njofaƭar soom a ga’u na den. Kaa cungoogu na den o cofel, ndaa a coytax soom a nanaa.

⁸Sabab took no we na siiseeraa pind soo a saltirandaa o qol fo o gend um boo yaa o lakas a jegkateerna maa ta genna, a refangee den soom.

⁹Nanoodaam a qool qac xa ƭelem axeeke no Yaal oxe Hupna fop: «Mexe daaɓooxaa yee pind mayaan keene xan a yoq o ƥor. Kaam ee pind maak mosu keene xan a mbes a pec.

¹⁰A ƭing taxar biiñ alaa fodirna fo pef xarɓaxay no qoox ƭik xan a wat xa liitar qarɓeen tadik doŋ, too oxuu duufna barig ax sax oo, kilo xarɓaxay doŋ a saxadkaa.»

¹¹Sabab took no we na inooxaa nqes teelu, ndax da mbaaƭik maa a yer a qaaɗu a payna soo a njoqooyooxaa boo kam o yeng ole, yaam a mbay nep fa biiñ.

¹²Fo nqilimb fo a tiiti fo a ñal fo a liit na njibaa me da yertaa, ndaa a ƭat den yongee na pi no Yaal oxe, too nga’ee ke xa ƥay um a njalaa.

¹³Ten taxu, xeet es yegkee yeg boo a sutel saax le. Wiin maak we ten xan a nqon fo nqeex, soo a koɗom a mbaraa lakas we fop.

¹⁴Jaaniif oxe ɗaaya a peep, a wet o don um bo ta fag. Maaga, wiin maak we boo no fo mboƭomsogor ne xan a njimboox teen fo yo’in den fo mbumbaay den.

¹⁵Wiin we fop xan a neewandoox, a yer fo ut ole, soo oxe na ɗeettaa nga’yaamoo a lupandoox.

¹⁶O magnel ole no Yaal oxe Hupna fop xan a feeñ na ƭat. Kaam ee o tedel ole Roog fa Tedu fee xan a feeñ no cofel.

¹⁷Paal ke xan a suufaa no piitnatin ke na teeru fee nen xa suufand den, soo fo mbambe ne na yableel a mbaaƭtaa teen ñaamel den.

¹⁸Ndaw naqad took no wiin we ngumneena a qaw ale no njofaƭar den nen qoox, soo a ƭooqaa a qaw ale na bakaad den ne pis a ɗooqtaa a sareet.

¹⁹Kaa da layaa yee: «Fat a ñofand, fat a ñof o fi ke ta hebooxna, ndax i nga’in. Fat yuuƥ ne no Tedu xe Isra’el a fadnoox, ndax i mbaagin o njaɓ.»

²⁰Sabab took no we na nqoyaa paaxeer ke paax, soo paax, da nqoyan paaxeer. Kaa njangit o niɓaan ole a qoolaand, soo a qoolaand ale, da njangtin o niɓaan. Qaaɗu ke kaa ref na den pelu, soo pelu ke a ref qaaɗu.

²¹Ndaw naqad took no we na ƭeetaa a qoox den nen waa njegna o and, soo a mbi’ooxaa jegu yiif.

²²Ndaw naqad took no we ndefna a salma-koor na yer biiñ fo we ndefna pir maak no sat a yer a qaaɗu.

²³Kaa mbartaa oxe tooñna yaam a qaf, soo o cofu xe, da nqañtin wargal um.

²⁴Ten taxu ne aal fiɗel a raaɓtaa sañ mbeeru fo ne boob laa jooreena no ƈulfaan a sooytaa, neene a paƴ den a mbotitkaa, soo piɗ den a pasaroor nen fo ut, yaam kaa da mbañ a cangin ale no Yaal oxe Hupna fop soo a nqeef fa lay fee no Tedu xe Isra’el.

²⁵Ten taxu fuux le no Yaal oxe a biltooxan xeet um, ta yoɗ o ɓay um soo a xawin. Xa coong axe kaa sendaa, soo xa tal axe yee ɗareet no ped ke nen ƭaaq. Kaa koy, keene fop taxee fuux um a ɓoos, too o ɓay um ole yoɗooxa boo fa ndiik.

²⁶O Yaal oxe xan a sipan qeet koƭu ke o anddiloor, a wuuƴ a den, ndax da ngar, a inoortiid no cat ke no lanq ke. Den oo weene a siipiidaa, ndax da ñof o mbadiid.

²⁷Jegee oxaa xijna na den mbaat ta tolofaa. O leng ɗaanee mbaat ta nim. Jegee oxaa o kumnoor um a yandna mbaat o ƭool o ñaaƭ um a ɗeg.

²⁸A kas ake den kaa lakel, a qali ke den a ŋaaynel. Xa poxos axe no pis ke den kaa naang koŋ nen ɓil saƭku, soo a caf ake na sareet ake den a mbangoortaa nen a und.

²⁹Kaa mbumbtaa nen njogoy ƥasil, a ŋuuraa nen njogoy njanglax naa pokooxna mbuufuɗag um, a ɓisan, too o leng saɗee gar, a suqtin no ten.

³⁰A koom, xan a ŋuuranan nen ŋurŋur le no maag ole. Muu ɗeetoona no saax le, o niɓaan fa naqad doŋ o ga’kaa teen, a eel a ƥaal ɗok a niɓaanin njeeƈ ne.