Read NQAARIIT NE ROOG Esayi 50 Bible Online

Esayi 50 - NQAARIIT NE ROOG bible

Esayi 50

¹O Yaal oxe kaa tee: «Taa a kayit a pinde le lalitna yee waasaam a ya nuun mbaat an jikooxum a nuun nen faɗ, ndax um rabditin o lad es? Nu njikooxange, paaxeer ke nu mbi’na taxun. Ya nuun a raxange, pakaad nuun taxun.

²Ye garuuma, xar taxu soƥiim meen o leng? Ye xoyuuma, xar taxu jaaɓaandeem? Ndax o ɓay es a raƥa raƥ boo waagee o mucil? Ndax kaa jegiim doole faa wattuuma? Aca i ndet boog! Kaam weernitaa o maag ole fa lay es, supit xa quluɓ axe a koƥ-a-ƥor boo liƥ ke a nqonaa fo a koɗom yaam ne foofi a ñakna soo a mbotaa.

³Kaam hulaa asamaan fee fo ɓaal-ee-ɓaal soo rokin ndoki ñaawoor.»

⁴O Yaal oxe na refkaa boo faw a ci’axam a layoorooƭ ale no daalbe we, ndax um and nam warum o saƭakinit o neewu doole xe. Nqes nuu refna kaa wetaa nof es, ndax um nan-giloox nen daalbe we.

⁵O Yaal oxe na refkaa boo faw kaa wetanaam nof es, too mi yoo fañiim, nomtooxiim a cinj.

⁶Kaam dekan’u ndiiñ es we mbadoogaxama, we mbofoogna o raatam es, um letin a den xa ƭek es, too a tuxid ake fo a ben ake tax’ee um sing mukit es.

⁷Kaa koy, o Yaal oxe na refkaa boo faw kaa dimle’aam, ten taxu maafaandeem. Kaam saƭkand mukit es nen gac, too andaam ee sedkiim.

⁸Oxe na cooxaxam ɓur oxe paam es. An saɗu layoor fa mi? Fat a gar, a yoon fa mi mbaambir no kaahate. An bugu ref o pañ es? Fat a fodaam mbaambir!

⁹O Yaal oxe na refkaa boo faw kaa dimle’aam. An waagaxam o jamb boo a ƭat a ŋaayaam? Fañ es fop xan a sooƴ nen ndikoorik naa max ke a yaqna.

¹⁰Oxuu saɗarna o Yaal oxe fat a nan-giloox o ñuxur no tag um! Oxuu na ñaaƴaa no niɓaan ole too a ñak a qoolaand, fat a doon a koolax um no gon le no Yaal oxe, a damloox na Roog um!

¹¹Nuun fop koy we na oraa o dox ole fo nuun we ƥonooxna a kas fiɗel, keeke na cungaa a nuun: A aal ake na fiɗel le nuun fo a kas fiɗel ake nuun refu muj fee o Yaal oxe a geekanna a nuun. Xan nu ñaat took fa lanq.