Read NQAARIIT NE ROOG Esayi 51 Bible Online

Esayi 51 - NQAARIIT NE ROOG bible

Esayi 51

¹O Yaal oxe kaa tee: «Nuun we na naaɓaa o cofel ole too mbaaƭaxam, nan-gilooxaamoo! Ƭeetyo ɓil le nu mbaqaqoorna fo xooɗ le no gamb le nu suudteena.

²Ƭeetyo Abraham fee o taan nuun fa Saara fee axna a nuun. Abraham jeg’ee o ƥiy o leng ye xoyanuuma, ndaa barke’aanum, fi’in o taan na xeet fa maak.»

³O Yaal oxe xan a yaal a Siyoŋ, a yaal yaqatin ke ten fop. Xan a fi boo o mbiñ onqeene fesna a pec a nandat nen a Edeen, o tan oleene a nandat nen a ƭing ale no Yaal oxe. Baneex fo o ɗaay xan a ngen teen, a tagas fo fangax a kim a niwir a njibit teen.

⁴«Nuun xeet es, nan-gilooxaamoo a paax! Nuun a saax ake, ndungyo nof nuun farna fa mi, yaam a cangin ale na mi a inooraa, too a ƭat es na refkaa a qoolaand ale no qeet ke.

⁵O cofel es a matiida, a muc es xan a feeñ, too o ɓay o mayu katil ole mi xan a hate qeet ke. A pimb ake xan a yaakaaraam, a ngooloox o ɓay es.

⁶Ndaxaaƴooxyo farna fa asamaan, ƭeet took lanq ke. Asamaan fee xan a mooc nen fo suun, lanq ke a siɗoox nen ñirax, soo we ngenna teen a nqonit nen buƈ, ndaa a muc ale mi xan a ref boo faw, too o cofel es wañooxkee.

⁷Nan-gilooxaamoo nuun we andna o cofel, nuun xeet fee njegna a cangin es na qeeñ nuun. Ba nu saɗar naqadil ke no wiin we, too ba nu send yaam a ben ake den.

⁸Muj den xan a nand fo ndikoorik naa max ke a ŋereñna, ndaa o cofel es xan a ref boo faw, a muc es no suk boo no suk.»

⁹Yokooxi, a ñamaak ale no Yaal oxe! Ñofi yokoox! Rokooxi katil! Yokooxi nen a pe ake yaaga, no camaane ke mbaafna. Ndax refee yee wo maafu a Rahab[45] junjang, wo dib’u a Niŋki-naŋka boo ta suur?

¹⁰Andum refee yee wo weernu o maag ole, poofi ke na juwaam fee, soo sex a ƭat kam qooƭ ke no maag ole, ndax we mbateena a suur?

¹¹Neene, we o Yaal oxe a watna, xan a nomtooxiid. Xan a mbadtiid a kim baneex kam Siyoŋ. O ɗaay o fagkeer xan a meleƈin mukit den, baneex fo o ɗaay a ndokiid, soo naqad fo xa iin a ndiƈatoox.

¹²«Mi yoo, mi refu oxe na yaalaa a nuun. An refo boo saɗaraa o kiin oxe na xonkaa, o ƥiy Aadama fee muj um a refkaa nen fee no daaƭ le?

¹³Xar taxu o weecaa o Yaal oxe sakoonga, a letin asamaan fee soo a sinj lanq ke, soo sendaa yaam diid bes fuu refna mbaambir fuux maak le no ñaañagadil oxe inooxanoonga, ndax ta yaqong? Kaa koy, xar yoqatu no fuux um?

¹⁴O paɗ oxe na ñaatlandeel xan a woktel no miñeer, xonitkee no ngupuus um, too ñaamel um ndangkatee.

¹⁵Mi refu o Yaal oxe Roog of na jumbandaa o maag ole boo a yag-ee-yag ake ten a ndititaa. Gon es refu o Yaal oxe Hupna fop.

¹⁶Ɓekaam fa lay es no don of soo laqong no yook ne no ɓay es, ndax um fiisatin asamaan fee, sakatin lanq ke soo lay a Siyoŋ ee: ‹Wo refu xeet es.› »

¹⁷Yokooxi, wo Yeerusaleem, kaam ee yokooxi, too inoox, wo fee yeritna no ɓay no Yaal oxe o mbeeƭ onqe yipna fuux le ten. Yeraano boo ɓuus nqiim ke, naag nep way.

¹⁸Ndeer xa ƥiy axe rimoona fop o leng na den ɗoxirang. Ndeer xa teɓandoong axe yaroona fop o leng na den damirang o ɓay.

¹⁹Taamaala ke a ndalaang ƭik ƭik: yaq fo naqad, xire fo biim. An na ɗomatooxankang, ndi an um hebilkaa ndax ta yaalong?

²⁰Xa ƥeef owe ɗaraas, a luuñaa a lanq no ped ke nen naak-a-koƥ laa dameena no mbog, a sufoox fuux le no Yaal oxe fo o nqasan onqe Roog of.

²¹Ndiiki koy, nan-gilooxi a paax, wo Yeerusaleem fa toroxu fee, wo fee wayna nep, too ñimiro biiñ.

²²O Yaal oxe Roog of refna o caajangin of kaa sedan xeet um, soo a yegnang kene: «Xam xot no ɓay of o mbeeƭ onqe na firɓandaa, o mbeeƭ onqe yipna fuux le mi, yerkatiro teen muk.

²³Xam cooxin we na ñagadilang, den we layoogoonga yee: ‹Ɗaasooxi ndax i ñaaƴ took of.› Maaga, kaa o xaƴ’u ndiiñ of faŋ nen lanq, wiin we a nduutan nen mbed.»