Read NQAARIIT NE ROOG Esayi 52 Bible Online

Esayi 52 - NQAARIIT NE ROOG bible

Esayi 52

¹Wo Siyoŋ, yokooxi, ñofi yokoox, jegatin doole. Wo Yeerusaleem, teeru fa tedu fee, rokooxi toki of ke moƴna o mos, yaam o qucooxeer mbaat o qoolaƭaru dakkatee me wo.

²Wo Yeerusaleem, inooxi yirfoox fo ut ole, moofatin na seek of. Wo Siyoŋ o ndoog onqe dameena mbaƭ, wokti a ceng ake no cok of.

³Keeke o Yaal oxe a layu: «Kaa nu ƥoxot’el nen faɗ o meere-meere, too o fiftin rabidkaand yaa nu mbatkeel.»

⁴O Yaal oxe na refkaa boo faw a doona teen ee: «Pitik, xeet es kaa laqooxik’u Misira, cinj kaaga Aa-asuur we a ñagadil a den.»

⁵Kene o Yaal oxe a layu: «Ndiiki o mat, xar xottum teen, yaam xeet es kaa ƥoxotel o meere-meere? Ñaañagadil we den owe mbalalooxaa, soo gon es a gen no weneel cay.

⁶Ten taxu xan xeet es a and gon es. A koom, xan a and ee mi layu yee ‹Mexey!› »

⁷Ndaw o jaf o mosu took xa coong axe, no xaa na yegnitaa yegil mbaax! Kaa yegnitaa jam fa baneex fo a muc, soo a layang, wo Siyoŋ ee: «Roog of refu o maad of.»

⁸Nan-gilooxyo o ñuxur no we na yetooxaa teeru fee. Owe mbalalooxaa. Den fop owe na xa ƈeel, yaam kaa nga’ood o Yaal oxe ta nomtooxiidaa Siyoŋ.

⁹Nuun yaqatin ke Yeerusaleem, ƈeelyo a maak nuun fop, yaam o Yaal oxe xe yaalaa xeet um, a wataa a Yeerusaleem.

¹⁰O Yaal oxe kaa lalaa qeet ke fop o ɓay o tedu le ten, too a muc ale Roog in xan a feeñ boo no cat adna.

¹¹Nuun we saqna ƥaxañ ke kesaneena a paɗax ale no Yaal oxe, njangooxyo, ñof o ndet, sutoox a Babilon, too ba nu nduq dara kaa xoolaƭarna. Ƭofityo nqool, yaa nu sutooxan.

¹²Nu sutoorkee ñofandax, too nu ndetitkee a kaat[46], yaam o Yaal oxe refu oxe na fodkaa a nuun mbaambir, Roog fee Isra’el na adinkaa a nuun itam.

¹³O Yaal oxe kaa tee: «O tag es xan a jar, a kañel, a yoɗel soo a ɓoxotel tedaanga faa moƴna o magin.

¹⁴Ne jaaku a ndiidit’ina ye da nga’uuna, - yaam ne ta gaañ’eena boo saq’atee o nand no kiin, too o mem um nand’atee fo o mem no ƥiy Aadama, -

¹⁵neen qeet mayu a ndefitkaa no jaq yaam o ten, soo maad we a naang cel mbaambir um, yaam xan a nga kaa da mosaandeena o yegin, a and kaa da moseerna o nan ta layteel.»