Read NQAARIIT NE ROOG Esayi 53 Bible Online

Esayi 53 - NQAARIIT NE ROOG bible

Esayi 53

¹An gimu ke i nanna ta layteel? An anddu katil ne na ñamaak ale no Yaal oxe?

²A yoɗooxa mbaambir no Yaal oxe nen dugatin, nen saqit laa na sutooraa no ƭak. Saq’ee njer mbaat o mosel olaa waagna o yul a kid in. Dara fel’ee a in no mem um.

³A sibe, too wiin we a mbañin, o koor coono too a and jir, a nand fo xe wiin we a mbañaa o nga. I nqeefaan, too a ƭat in yongee no ten.

⁴Yaaga fop toox de, coono in a sufooxu, a roxondoox a cir ake in. I ƭeetaan nen o qawe, nen oxe Roog a xawna, a ñagadilin,

⁵ndaa a dibe yaam pakaad in, a xawel yaam njofaƭar in. A qaw ale a dala took um, ndax i njeg jam, too na pexey a uut ake ten i mbodtu.

⁶Kaa i mbirlooxoogu in fop nen fo mbaal fo mo’u, oxuu refna a sak a ƭat xoox um, ndaa o Yaal oxe a doona took um njofaƭar in, in fop.

⁷A ñagadil’e, a jaɓin too yaƥatee tus. Kaa nand’u nen o mbaal onqaa na ɓiseel no warand, nen mbaal naa muumna mbaambir we na nduusan, too yaƥatee o don um sax.

⁸A dame, a hate’el, a inel meen, ndaa an no suk um a ƭat um a yong’u na muj um? O ñoow um a xuuf’e no lanq ke, kaa xaw’el boo na fa nqon yaam pakaad ke na xeet um.

⁹A gase a ndeer no soxodu we, a mboy um a ref ale no yaal halal. Ten koy, mosee o fi bakaad fa leng, too o leng mosee o nan xa maaƥ a sutooraa no don um.

¹⁰Kaa fel o Yaal oxe ta duguñin, a heesandin, ndaa ne ta ɓoxotna o ñis um nen sadax fa nqendandoor, xan a ga xa taan um, a ñoow miñu, too o bug ole no Yaal oxe xan a fadnoor no ten.

¹¹Xan a ga a qoolaand ale[47] too xan a deyƭoox yaam coono ke ta gomna. O tag es o cofu xe xan a jofand wiin mayu, yaam ne da anduuna, a gadoox njofaƭar den.

¹²Xam cooxin a las um fo kelfa ke, ta xaajir fo we njegna katil kalal ke, yaam a ɓoxotooxa na fa nqon. A ɗeet’e nen saasaay kaa, a gadoox pakaad no wiin mayu, soo a xeɗan we a qaw ale a jagit’ina.