Read NQAARIIT NE ROOG Esayi 55 Bible Online

Esayi 55 - NQAARIIT NE ROOG bible

Esayi 55

¹«Heey! Nuun fop we ngoɗomeena, ngaryo no poofi ke, nu njegangee xaaliis sax oo. Ngaryo, mbaaƭan a qoox nuun kaa nu ñaamna, nqot na biiñ fee fo no fo sis ole, jegee ndabid, ci’it oo.

²Xar a ɗaxu nu ñakaa xaaliis no kaa naangeerna o ñoownaa, nqijaa no ke waageerna o giñ a nuun? Nan-gilooxaamoo boog, too yaaga xan nu ñaam ke faaxna, sawar yaam ñaamel pelu.

³Ndungyo nof nuun too ngar me mi. Nan-gilooxyo, too xan xa laaw nuun a ñoow. Xam dalin fa nuun ngiɓoor naa na refkaa boo faw, ci a nuun yirmande es, ne regtit’anuuma a Dawid.

⁴Fi’’aanum o seede no qeet ke, dalnin nen kelfa fo o yaal a saax ake.

⁵Xan o xoy xeet faa andeeroona, too waa and’eeroonga xan a ƈufiid me wo yaam mi, mi o Yaal oxe Roog of, o Tedu xe Isra’el ci’oonga o ndam.»

⁶Mbaaƭyo o Yaal oxe, yaa ta waageena o ga, ƈufginooxeenoo, yaa ta refna paam nuun.

⁷Fat o soxodu xe a waas a ƭat um, o piifi paaxeer oxe a supit a qalaat um. Fat a ngeleeroox farna fo o Yaal oxe na yirimkaa a den, a njaɓnoox na Roog in fee na waasantaa boo ta dey sik.

⁸«A qalaat es mbogree fo a qalaat nuun, too a ƭat nuun a nguutatira fo ake mi.» Keene o Yaal oxe a layu.

⁹«Ne asamaan a yooroorna lanq ke, a gartin took, neene a ƭat es fo a qalaat es a ngartu ake nuun took.

¹⁰Ne a teƥ ale fo a kalam a ƥuuɓu ke a mbudoortaa na asamaan too nomtooxkee teen a refangeerna kaa nquƥand lanq ke bo dee sap, a ndos a den soo a saxin tuufe-duufe ke, a coox o tuuduuf oxe ax soo oxe na ñaamaa ta ci’in ñoowir,

¹¹neene a nandu na fa lay fee na sutooraa no don es. Nomtooxiidkee na mi o ƥor too fadnee ke buguuma, a fadin ke taxna um lulin.

¹²O ɗaay nu nqotitkaa a ƭat, soo yooneel na jam. Xa coong axe fo a ñaang ake xan a ƈeelaa mbaambir nuun, soo taxar ke na koƥ ale fop a mboxaa.

¹³Xan pilaawo a saxataa yee kol, pafid mirti[48] a saxaa me qooc ke a ndeeƭna. Keene xan a ref o ndam no Yaal oxe, o anddiloor o yaqooxkeer olaa na bugko wetandaa kili ke ta fi’anna a nuun.»