Read NQAARIIT NE ROOG Esayi 56 Bible Online

Esayi 56 - NQAARIIT NE ROOG bible

Esayi 56

¹O Yaal oxe kaa tee: «Mbi’yo ke refna a ƭat, ngay o cofel, yaam a muc es ndiik a fadiid, too o cofel es xan a feeñ.

²O kiin oxe na fi’aa keene, a saƭik teen, a niw a paax bes fee na ñootnax ale soo a fañ o fi paaxeer leng, a ɗaaya!»

³O gataakoon ole damooxna no Yaal oxe waree o xalaat boog ee: «O Yaal oxe kaa xaajaam, a saytirandaam fa xeet um.» Baa o ƥuje xe a lay itam ee: «Ndaxar mbeeru rek refum»,

⁴yaam o Yaal oxe kaa tee: «Boo ɓuje we a niwna pes a ñootnax ke dalnuuma, a ngeenoox no mbi ke felaxama soo a ndamoox a paax no ngiɓoor es,

⁵xam ci a den kam tabax ke no Mbind ne mi a seek fo gon laa moƴna xa ƥiy xa koor fo xa tew. Xam coox a den gon laa ñufkateerna boo muk.

⁶Xa kataakoon axe ndamooxna na mi o mat, mi o Yaal oxe, ndax da niwaam, a mbex gon es, a ndef dag es, a niw a paax bes fee na ñootnax ale soo a ndamoox no ngiɓoor es,

⁷xam ɓisiid a den took o joong o tedu le mi. Xam mayƭand a den fo o ɗaay kam Mbind a qeƭ ne mi, jaɓ sadax toxel ke fo sadax lakas ke da ƥoxotkaxam fop took o sadaxand ole mi, yaam Mbind es xan a xoyeel Mbind a qeƭ no qeet ke fop.»

⁸O Yaal oxe na refkaa boo faw, oxe na fokataa we ndaxeena na Isra’el kaa tee: «Xam fokatahin lakas waa mbogreerna fo we fokatuuma boo ƴut.»

⁹«Nuun ƥaaɓaan ke na koƥ ale fop, nuun muumeen ke no suungaan le, ngaryo ñaam!

¹⁰Yeeyetax we Isra’el fop fuul a ndefu. Naangee o anddaa dara, a ndef xa ƥox xa muumu xaa mbaageerna o mbox. Kaa mbondooxaa, a ndef no ƭaaɗaa, too mbaagee o ndeyƭoox o ƭaan.

¹¹Xa ƥox xa say a ndefu itam, axaa mbaageerna o ngiñ, ke da ndefna gaynaak fop oo! Dara refee na qoox den, a yuxum a qoox den soom a ndeefaa, oxuu refna na den o njiriiñ xoox um a waaƭaa.

¹²Kaa layaa yee: ‹Ngaryo i mbaaƭik biiñ, yer a yer a qaaɗu. O feet xan a nand nen a xaye, yaam ke yoqna waagaand tig.› »