Read NQAARIIT NE ROOG Esayi 58 Bible Online

Esayi 58 - NQAARIIT NE ROOG bible

Esayi 58

¹O Yaal oxe kaa tee: «Falalooxi a maak, fañ o waas. Fat o ñuxur of a nannoox koƭu nen fangax a luuƥ. Yegni xeet es njofaƭar den, andnoor we no mbind Yakoob pakaad den.

²Ñaal oo ñaal kaa mbi’ooxaa waa na mbaaƭaxam, nen waa mbugna o and ke um cungaa da mbi. Kaa nandtaa saax laa na mbesooraa ne warna too mbaasee a ƭat ale Roog den a dalinna. Kaa nqeɗaxam kate cofu soo a mbug um ref fa den.

³Kaa laamtaxam ee: ‹Xar a jiriiñu i ngooraa, yaa ga’eeranoona? Xar a ɗaxu i ndamaa cer in, a ƭat of a yongangee teen?› Maaga um doon ee: Ƭeetlooxeenoo nuun fa qoox nuun: Koor ne nuun yaqanee nu ƈufanaa o njiriiñ a qoox nuun, ñagadilaa jaajal we nuun.

⁴Koor nuun no nqasir fo ñimatir a ɓekaa a nuun fo no unreel xa kurpeeñ. A qeƭ nuun waagee o fadiid me mi, yaa nu ngoortaa neene.

⁵Ndax keene refu koor ne buguuma, ñaal ne o kiin oxe a damna cer um? Yoorin xoox nen xeet, deroox o saaku, wondoox kam ndaw, ndax no ndigil keene nu nqoyaa koor, ñaal naa felna o Yaal oxe?

⁶Keeke refu koor ne buguuma: Ten refu yee o wokit we ngumteena ceen took o hup doole, ɗeg ŋaƭir ke no kadoor ke da ireena, we na toroxandeel, o fi da njeg a qoox den, ɓol kadoor ke fop.

⁷Ten refu itam o xaajir fo xe xeexeena ñaamel of, rool we njegeerna maa njaɓnooxna, o wetan a den mbind of, oxe ɓangdeena, o cooxin ñirax, soo fañ o fes a cinj o pog of.

⁸Maaga, a qooland of xan a naag dañ nen mbeet, uut of a wod no ñofu. O cofel of xan a adooxanong, soo o ndam onqe no Yaal oxe a adnong.

⁹O Yaal oxe xan a jaaɓong, o xoyangaan. O ƴufginooxangaan, xan a layong ee: ‹Mexey.› O waasangaa ñagadil ƭomu ke me wo, waas lakas we o joxoñaa, waas ñu itam,

¹⁰xaajir ñaamel of fo xe xeexeena, giñnoor o laaw no toroxu xe, a qoolaand of xan a rax o niɓaan ole, too o yeng of xan a refaa nen njoloor.

¹¹O Yaal oxe xan a ref o ƭooɗox of kili. O refangaa kam ee kam a koƥ-a-ƥor ale sax, xan a ñaamnong boo wee tem, soo a ɓaatong doole. Xan o nand nen a ƭing alaa sooreena boo sap, nen a mbeel alaa ŋiiskeerna.

¹²Maaga, xan o yoɗatin ke gef’eena yaaga soo maxatin took a per ake mbaas’eena yaaga. Xan o xoyeel o qeexendand kefatin ke no saŋe ke, o ñooñoowdand fo ƭat ne fo xe na fi’aa boo saax le a geneel.»

¹³O Yaal oxe kaa tee: «Boo fañoona o yapatil bes fee na ñootnax ale, ndax ƴufankiro ke feloonga na bes fa tedu fee mi, o xoyangaa bes fee na ñootnax ale bes o ɗaay, ɓoxot bes fee kesaneema o ndam, fañ o jaltin, fañ o ƴufan ke feloonga soo fañ o ñimatireel teen xa koɓong,

¹⁴xam refat a cur o ɗaay of. Mi o Yaal oxe, xam jaabnong took xa cul axe moƴna o ngoƭ took soo ñoowdandtong lam ne no taan of Yakoob.» Keene no don no Yaal oxe a hatu.