Read NQAARIIT NE ROOG Esayi 59 Bible Online

Esayi 59 - NQAARIIT NE ROOG bible

Esayi 59

¹Ba nu mboog ee o ɓay no Yaal oxe kaa raƥ boo waagee o mucil a nuun mbaat nof um a mbeƭar boo waagee o nan a nuun.

²No ndigil tooñ ke nuun saƭtirandu a nuun fa Roog nuun. Pakaad nuun o mat na taxan o xuruloox, ndax nan-gilooxkee a nuun,

³yaam xa ƥay nuun kaa yedin, qol nuun a ndoɗig yaam tooñ, too nu yaƥatangaa, xa maaƥ taxun mbaat njofaƭar.

⁴Jegee oxaa na xeloorteel o cofel, o leng naagee o layoorteel a ƭat. Na xa koɓong a ndamlooxaa soo a layaa xa andand, paaxeer a mbudaa soo a ñootaa njofaƭar.

⁵Kaa ƥopaa a ƥoof fangool, a ndiwaa pog a porxolaac. Oxuu ñimna a ƥoof den a ñak o ñis um, too owaa mboƈtooxaa, sax a sutoor teen.

⁶Ke da ndiwaa jaɓee rokooxel, o hulooxel ne’aand, yaam o njakad rek a oraa. Xa ƥay den njalkee jam muk.

⁷O fi paaxeer doŋ a ƈufanaa, a ñofandooxanaa o mbar o cofu xe. Yuuɓee dara a refangeerna o mbi lakas we paaxeer. Muu da ndeefna, a mbaas maaga yaqe fo boom.

⁸Andee a ƭat jam ale too o cofel reefee a den. A ƭat a quƴooxu ke moƴanu a den, too oxuu xotna a ƭat akeene, ga’kee jam boo muk.

⁹Ndiiki koy, i andata xar taxu a ƭat a goƭ a in, too o cofel xalamee mat a in. Kaa i yaakaaraa a qoolaand, ndaa muu refna oxe tit a niɓaan. Kaa i cungaa Roog a feed, ndaa in wey ñaaƴaa kam o yeng o niɓaanu taruus.

¹⁰Kaa i kasaƥ-kasaƥnaa nen o puul oxaa na lernooxaa tabax, njuxɓaa nen waa njegeerna a kid. Kaa i tolofaa njoloor o mbuc nen waa na ñaaƴaa na kid-a-caɓru. Ke i mbodna mbod fop oo, i moƴanee xon we.

¹¹Kaa i ŋuuraa nen ursu, in fop, soo cuuc-cuucnaa nen a nuukuur. A ƭat i cungaa, ndaa feeñee sen, i nqornooxaa a muc, ta goƭ a in lool.

¹²Kaa i nanaƭaranong a caf a mayu. Tooñ ke in kaa njambaa a in, pakaad in a nqox na yiif in, too i anddilooxata tooñ ke in.

¹³O Yaal oxe, kaa i nanaƭaranong, nqañong soo mbañong o ndeef, wo Roog in. Ñagadil rek i laytaa mbaat naa i siiknooritna. Ke refna na qeeñ in fo ke i njegna na yiif in xa maaƥ xa ƥor oo.

¹⁴Neene, a ƭat a goƭa meen, too o cofel waagaand o daaw. Ndigil ne kaa tolofaa na baayo faa, too o woor ole jegee meen a seek.

¹⁵Ii, ndigil ne a sooƴa, too oxe na jeemaa o gore xan a ɗegooxel. O Yaal oxe a ga’a a paax fop ke xew’ina too jaɓee muk o cofel ole a uupel.

¹⁶A ga’a yee jegee o leng oxaa ƴufgiidna, too kaaga a betaan lool. Maaga, a fosooxa o doon teen o ɓay ten fa xoox um, o cofel um a ref doole um.

¹⁷O cofel oleene refu ndoki njelem ne no ngang um, soo a muc ale a ref o maxanda xire um. A rokooxa ndoki ndabdinoor ne soo a huloox o jaflax nen sabadoor.

¹⁸Xan a rabid pindeef ke a pi den, fuux um a yen no noon um, ta xaw fañ um soo a rabid we ngenna na pimb ake a pi den.

¹⁹Neene, xan gon le no Yaal oxe a saɗarel no mudand, soo o ndam um a niwel no batand, yaa ta fadiidkaa nen a ƈufnand a paŋe laa a und a balinna.

²⁰«We Siyoŋ koy, xan a ref na den o baawat, den we mbesna nanaƭar den a cinj na Yakoob.[49] Keene o Yaal oxe a layu!

²¹O Yaal oxe kaa tee: «Keeke refu ngiɓoor ne dalnuuma fa den: Yiif es le fudooxna na wo fo fa lay es fee ɓekuuma no don of, suqitkiim a den no don of muk mbaat no don na xa ƥeef mbaat no don na xa taan of no ke xotitna ndiiki boo faw. Mi o mat layun.»