Read NQAARIIT NE ROOG Esayi 60 Bible Online

Esayi 60 - NQAARIIT NE ROOG bible

Esayi 60

¹«Wo Yeerusaleem, inooxi, meleƈi yaam a qoolaand of aley feeñaa, too o ndam onqe no Yaal oxe xe meleƈaa took of.

²O niɓaan ole le muuraa lanq ke, a kuy ale a muuraa qeet ke, ndaa wo o mat, o Yaal oxe a xooldandaang nen njeeƈ naa na wataa, too o ndam onqe ten a feeña took of.

³Qeet ke fop na qoolaand of a njaginkaa, soo maad we a nqot no meleƈ le na yoɗoortaa na wo.

⁴Ɗeeti a paax me widoonga. Den oo wene a mbokatoora fop soo a ngaraa me wo. Xa ƥiy xa koor axe wo yoo weene a inoortiidaa koƭu, a yoon fo xa ƥeef xa tew axe ngadooxeena.

⁵Yaa o ga’kaa a den, xan o felakinoox, kam of a fel, soo xeeñ of a may muut fo o ɗaay. Kalal ke no maag ole xan a njagniid me wo, soo o jeg ole na saax ake a nqetiid me wo.

⁶Xan keeleemb pagkatar a muur saax of, da ndef xa lox keeleemb axe Majan fa Eefa, a inoortiid Saba, den fop. Xan a ƥislooxiid wurus fa cuuraay, a simataa o Yaal oxe.

⁷Xa siir axe Kedaar fop xan a mbokatoor me wo, soo a suk paal ake Nebayot a ndefanong. Xan a ƥoxotel took o sadaxand ole mi nen sadax fa ndoxel faa felaxama. Neene, xam ɓoxot Mbind es mosu o ndam.

⁸Aniin oo weene na yetaa nen a eel mbaat nen a nuukuur akaa na njagnaa no nguna den?

⁹We ngenna na pimb ake, mi a yaakaaru, a kaal a maak a cula’ir ake na ndetaa Tarsis a adoox, a nomtitiidaa xa ƥeef na saax a koƭu ke, da saq wurus den fa xaaliis den. Kaa ƥoxotiidaa gon le no Yaal oxe Roog of o ndam, a simatiidaa o Tedu xe Isra’el ɓoxotoonga o niwel.

¹⁰Xa kataakoon na maxatinkaa saŋe ke wo, maad den a njalanang. Kam fuux es xaw’aaxoong tigi, ndaa kam o mbeq es yirmaaxoong.

¹¹Pegax ke wo xan a mbetel cay, mbegkataand ñaal o yeng a jalan, ndax kalal ke na saax ake a ndokniidel me wo, soo maad we den a adniriid.

¹²Saax le mbaat maat ne ndagooxkeeroonga xan a saŋkoox. A saax akeene xan a ngefel tuƈ.

¹³Ke refna qaaƴoor Libaŋ fop nen a teex filaawo ke fo ake no nar ke fo ake no quƭ ke, xan a ƥisiidel me wo, ndax da mosandtel mbind tedu ne mi. Neene um laltitkaa o ndam onqe no mbiñ onqe um refaa.

¹⁴Xa ƥiy axe no we ñagadiloogoonga xan a matiidong, a lupandoox. Fop we nqaadnooxoogoonga xan a ngooknoox na caf of, a nqoyang teeru fee no Yaal oxe, Siyoŋ fee no Tedu xe Isra’el.

¹⁵Kaa o waas’el pelek, o leng fex’irang mbaat ta gar a ɗeetiidong. Ndiiki koy, xam fi’ong o ref qaaƴoor boo kili fo kaa na ɗaaynooraa bo na moos boo moos.

¹⁶A saax a can ake xan a numnang, soo maad we a njeƈnang. Maaga, xan o and ee mi o Yaal oxe, mi refu o Muumucil of, mi o Cegu doole xe Yakoob refu o baawat of.

¹⁷Xam ɓisiid me wo wurus ee xanjar, ɓisiid itam xaaliis ee njelem, xanjar ee a teex, njelem ee a ƥil. Xam fi jam fee a ref o kelwaar of, soo o cofel ole a ref o maad of.

¹⁸Yo’in leng nankataand no saax of, too yaq fa taamaala njibkatee kam o jegel of fop. A muc ale xan a ref saŋe of, soo a simat a ref begax of.

¹⁹Njeeƈ ne refkatee a qoolaand of no ñaal ne, too a qoor ale refkatiran no yeng ole, yaam mi o Yaal oxe Roog of, xam xoolandang kili soo fudin took of meleƈ es fop.

²⁰A qooland ale inooxkatee me wo, nen yaa njeeƈ ne a mudaa mbaat nen yaa a qoor ale a mudaa, yaam mi o Yaal oxe, xam xoolandang kili. Xan ñaawax of a fag.

²¹Xeet of fop xan a ndef jofu, a njeg saax le boo kili, den we ndefna tuufe-duufe kaa na saxaa kam a ƭing es, a ndef we saktuuma xa ƥay es ndax da lalit o ndam es.

²²A carind ale moƴna o neew xan a ax wiin cuni-cuni, ale moƴna o hees a refat xeet fa njegu doole. Keene um ñofkaa o fi, mi o Yaal oxe, yaa hap um a fadna.»