Read NQAARIIT NE ROOG Esayi 63 Bible Online

Esayi 63 - NQAARIIT NE ROOG bible

Esayi 63

¹Ndi an oo o ñaañaaƴ oxeene na inoortiidaa Edoom, a sutoortiidaa Bosra refna teeru fa maak fee, toki ke a yaxig coy? Kaa rokoox sabadoor um, a ñaaƴaa o cok um took soo a hooloox doole um. «Mi fee na layaa cofu yoo soo jeg sañ-sañ o mucil.»

²Ndi xar yaxginu sabadoor of nene, a gakin toki of? O ga’angaan ee kaa o duutoogu xa biiñ no nirir.

³«Iyo moos, mi soom duutoogu no nirir ole, too o leng no qeet ke reeƭee fa mi. Duutaam xa biiñ axe kam fuux es, kam ngañak es um mokand a den, foofi den a silaam no toki, soo um gakin ke rokooxuuma fop.

⁴O nanangaan koy, kaam fosoox’u o rabdinoox xaye, too o hiid ole na bat ale na xeet es a fadiida.

⁵Ɗeetaam muu refna, ndaa o leng dimle’iidiraam! A betaxam lool ne o leng a ƴufgiideeraxama. Maaga, fosooxaam o doon teen o ɓay es mi fa xoox es, o say es a ref doole es.

⁶Kam fuux es, duutaam qeet ke, mokand a den kam ngañak es soo ɓax fo’oy den a lanq.»

⁷Kaam yegnitaa a pi yirmande ke no Yaal oxe, a tagas ake ten no paax ke ta fi’anna a in fop. Kaam yegnitaa o paaxel um no mbind Isra’el, paax ke ta fi’anna a den fop no mbeq um fo na yirmande um fa mbagkatar.

⁸Kaa lay’u yee: «No ndigil den ndefu xeet es, kaa ndef na mi xa ƥiy axaa ngodkeeraxama.» Ten oo a reeƭata o Muumucil den.

⁹Kam naqad den fop, refee oxaa luleena mbaat malaaka, ndaa mukit um sax sax muclu a den. Ten fa xoox um a wata a den no mbeq um fo na yirmande um. A meeɓa a den soo a gadoox a den no ñaal ke yaaga fop.

¹⁰Kaa koy, kaa nanaƭar’u, a ngooyand Yiif Tedu le ten, ta geleeroox, a refat o pañ den. O ten o mat ñoxoru fa den.

¹¹Maaga, xeet um a mbetandooxa ñaal ke yaaga fa Moyiis. Taa oxe suttuuna na foofi, ndax ta ref o kaynaak oxe no siir um? Ndi taa oxe ci’uuna Yiif Tedu le ten?

¹²Na ñamaak Moyiis, o Yaal oxe a letna o ɓay o jegu katil ole ten, a xaaj poofi mbaambir den, ndax ta jeg o ndam o ñufkeer.

¹³O ten ɗoxu a den da nqaañ no qooƭ ke na juwaam fee nen pis kam a koƥ-a-ƥor, too tolofee o ndara.

¹⁴Nen o siir olaa na jagnaa na yulanq, neene Yiif le no Yaal oxe a ɗoxtoogu a den na ñootnax ale. Neene deŋ ɗoxtoogo xeet of, wo o Yaal oxe, ndax gon of a ɓoxotel o ndam.

¹⁵Me fodoona took asamaan, ɗeeti, no ngenand tedu mosu ne wo, ga’i ke na daliidaa a in. Taa o mbeq o saasu nqe wo boog fa katil fee wo fo o liir ole jegoona? O Yaal oxe, ba o ñak o lal a in o mbeq of,

¹⁶yaam wo refu Faap in. Abraham fee o taan in andee a in, too Isra’el andee dara na in, ndaa wo o Yaal oxe, wo refu Faap in, wo xe ne’eena yaaga boo fa ndiik «o Baawat in».

¹⁷O Yaal oxe, xar taxu o xaƴ a in i mbirlooxaa, mo, ƭap a ƭat of, soo xaƴ a in i ŋaj boo i saɗaratirang? Nomtooxiidi yaam dag of, yaam a carind ake no lam ne wo.

¹⁸Na pe a mayeer soom xeet fa tedu of a njegu lam den. Fañ we in a nduuta Mbind tedu ne wo.

¹⁹Ndiiki kaa i nand nen waa moseeroona o maadooxan, nen waa moseeroona o jeg no gon of. Koo qaaci asamaan fee soo fudooxiid, ndax xa coong axe a ngirdoox mbaambir of,