Read NQAARIIT NE ROOG Esayi 64 Bible Online

Esayi 64 - NQAARIIT NE ROOG bible

Esayi 64

¹ne fiɗel a sooynitaa xa saaŋaan fo ne ta ŋeernitaa foofi, ndax fañ of a and gon of, soo qeet ke a send mbaambir of,

²yaa fi’oona com’andtu kaa i mboog’eerna. Koo fudooxiidi, ndax xa coong axe a ngirdoox mbaambir of!

³Mosaand o nan, nof ɗaaɗiran, too a ngid a leng mosee o ga roog fa lakas faa refeerna wo a fesoortaa neene no we yaakaaruuna.

⁴Kaa o xetiidaa fo we na mbi’aa cofu, a mbi’tan o ɗaay, too a mbetandooxang, yaa da ñaaƴaa na ƭat of. Kaa koy, fuuxaa, yaam ne i mbakaadna. Neene a refu yaaga boo fa ndiik. O koo, an na mucilkaa a in?

⁵In fop kaa i ndef wiin xoolaƭaru, too o cofel in kaa sibdoox nen liir ndoɗgu. In fop kaa i nandtaa nen a naf a leeƥu, tooñ ke in a maƥ a in nen nqeñ.

⁶Jegatee o leng oxaa na ƴufginooraa gon of mbaat oxaa yokooxna no damoox na wo, yaam kaa o sing a in mukit of soo xaƴ a in i mudaa na saŋkax yaam tooñ in.

⁷Yaag oo toox de, o Yaal oxe, wo refu faap in. Kaa i ndef ƭok ke, soo o ref o maamax oxe. Wo maxu a in, in fop.

⁸O Yaal oxe, ba o fuux bo ta ɗom, too ba o gen no wetandooxaa tooñ ke in. Koo dami rek ee in fop xeet of i ndefu.

⁹Teeru tedu ke wo kaa mbootat lool, Siyoŋ a nandtaa a koƥ-a-ƥor, Yeerusaleem o mbiñ o nduudne.

¹⁰Fiɗel a raaɓa Mbind tedu mosaan ne in me daan we in a simattoogoonga. Ke i mbex’ina fop a refata juum kefatin ƥor.

¹¹O Yaal oxe, ndax kaa o bugko fuudaa yaqe leene rek? Ndax xan o tiimaa tiim taar o marin, soo neewandahin a in boo cay?