Read NQAARIIT NE ROOG Esayi 65 Bible Online

Esayi 65 - NQAARIIT NE ROOG bible

Esayi 65

¹«Jaɓataam waa ƈufginooroogee-raxama a mbaaƭaxam, soo waa mbaaƭoogeeraxama a nga’aam. Layaam waa nqoyoogaandeena xeet es ee: Mexey, mexeya!

²No ñaal ne fop, kaam letin xa ƥay es farna fa xeet faa nanaƭarna, a ndeefaa a ƭat a paaxeer, a mbi’aa ke felna a den.

³Xeet faa na mbuuxɗandaxam kili a ndefu, too ƭasee teen dara. Kaa mbi’aa sadax kam a ƭing ake den, soo a ndoxaa cuuraay took xa sadaxand a muul.

⁴No poy ke a ngenu, a mbe’aa no luf ke, a ñaamaa a tegeƴ ruul soo a yipaa na xa tox den ñaamel qoolaƭaru.

⁵Kaa layaa we da nqettaa yee: ‹Goƭaam de, ba o duqaam ndik o xoolaƭarnaam.› Fuux na damaxam, a gen no kaƥaa kam es, yaa ga’uuma keene fop da mbi’aa.

⁶A woora yee keene fop kaa bindel mbaambir es, too tiimkiim, a refangee kaam rabid a den a pi den ne waritna deŋ.

⁷Mi o Yaal oxe, mexe layan ee: Xam rabdandoor tooñ den fop fo tooñ ke no daan den, den we ndoxoogna cuuraay took xa coong axe, a mbenaxam took a ñaang ake. Neene, xam rabid a den a pesoorooƭ den ale yaaga too hendkiim teen dara.»

⁸O Yaal oxe kaa tee: «Ne nduunq xa biiñ axaa mayna foofi a layteel ee: ‹Baa yaqel, yaam kaa barke›, neene um fesooritkaa fo dag es tigi, yaqkiim a den.

⁹Xam sutit na Yakoob o ndaan, kaam ee xam sutit na carind ale Yudaa oxe na lamkaa o joong o tedu le mi. We um jilkaa xan a njegin, dag es a ngenik teen.

¹⁰Xa saawit axe Saron xan a ndefat xa suufand a ked ake, a yulanq ale Akoor a refat ngetand xa siir axe na xeet es fee na mbugko mbaaƭaxam.[51]

¹¹Nuun we mbaasaxama koy, soo mbeecit o joong o tedu le mi, nuun we na ndoxanaa a Gaad ñaamel soo ƥoxotaa a Meni biiñ fa njaxase[52],

¹²mi o mat jagandanu a nuun fa nqon fa nqanqaar. Nuun fop xan nu ngooknoox, ndax nu nqirsel, yaam kaam xoy a nuun, nu njaaɓee, um lay fa nuun, nu mbañaam o nan-giloox. Ke faaxeerna na kid es doŋ nu mbi’u, too ke feleeraxama nu njilu.»

¹³Ten taxu keeke o Yaal oxe na refkaa boo faw a layu: «Dag es xan a njeg kaa da ñaamna, soo nuun o mat nu ndef no nqeex. Dag es xan a njeg kaa da yerna, soo nuun o mat nu nqonaa fo a koɗom. Dag es xan a ndef no ɗaay, soo nuun o mat nu ndef na gaci.

¹⁴Dag es xan a sawar tigi boo a ƈeelaa yaam o mbelakinax, ndaa nuun o mat, xan nu mbuuqaa yaam o ƭomel. Xan nu ƭomatooxaa, a qeeñ nuun a ngooy.»

¹⁵We jiluuma xan a saloortataa gon nuun ee: ‹Yaasam o Yaal oxe na refkaa boo faw a warnoorong nen o leng no weene!› Kaa koy, den we ndefna dag es o mat, xam coox a den gon lakas.

¹⁶Oxuu bugna o barke’el kam saax le, xan a xeɗin no gon Roog fa ndigil fee. Oxe na bugkaa o daaɓoox itam, xan a fi’in no gon Roog fa ndigil fee, yaam taamaala ke mbaafna xan a mbeectel, a mo mir na kid es.»

¹⁷«Iyo, xam sakatin asamaan fa nqas fo lanq qas. Ke faafna wetandooxkataand muk, yiif gomkatiran sax.

¹⁸Xan nu mbelakinoox too ngen no ɗaay yaam ke um sakkaa. Xam sak a Yeerusaleem ta ref o mbelakinax, soo xeet um a ref o ɗaay.

¹⁹Xam felakinoox na Yeerusaleem soo ɗaay na xeet es. O lool nanitkataand teen, too xa iin ne’aand.

²⁰Bax leng xonkatee teen mbaat o maak o nogoyeer, yaam oxe na moƴkaa o xuuɗaƭar xan a xon na xa kiid teemeed. Oxuu xonna koy too fadɗee xa kiid teemeed xan a ɗeetel nen o quuɗaƭaru.

²¹Xeet es xan a max pind, a ngen teen, a nduuf a ƭing, ta ref muud den.

²²Maxkatee ndax o lakas a genin, too njimbkatee ndax o lakas a muudoorin. Xeet es xan a nquuɗ nen taxar ke, we jiluuma xan a muudoor jale den.

²³Nqijkatee na kasaara too ndimkatee xa ƥiy da nqonaa na kid den, yaam kaa ndef ƥasil naa barke’uuma, den fo xa ƥiy den.

²⁴Boo da ngelko fo nqoyaxam sax, mi, xam jaaɓ a den, too boo da ngelko fo muukaa a qeƭ den, a soƥa jaɓaanum yaaga.

²⁵A teeteem ale fo o mbaal onqe xan a yoon a suufaa, njogoy ne a ñaamataa boob nen nqoox, soo fangool fee a ñoowtataa fo ut ole. Paaxeer mbaat yaq fa leng fi’kataand took o joong o tedu le mi boo ta xet.» Keene o Yaal oxe a layu.