Read NQAARIIT NE ROOG Esayi 7 Bible Online

Esayi 7 - NQAARIIT NE ROOG bible

Esayi 7

¹Ye Ahas fee o ƥiy Yotaam refna o ƥiy Usiya a refaa o maad Yudaa, Resin fee o maad Araam a yoona fa Peqah fee o maad Isra’el[5] reeƭna o ƥiy Remaliya, ndax da songik a Yeerusaleem, ndaa mbaag’iran o maaf.

²Ye mbind Dawid a yegneena yee Aa-araam we owaa ndala no jegel ole Efrayim, o maad oxe fa xeet um a senda, ne taxar ke na koƥ ale naagna firiis a yo’nooraa na qeñ ale.

³Maaga, o Yaal oxe a laya a Esayi yee: «Sutooxi boog xetik fa Ahas, yoon fa Se’aar-Yasuub[6] fee o ƥeef. Xan o soƥin farna fo cat naa na ƥaaxaand alaa no mbalka took naa, na ƭat alaa no qol olaa no qaaxaaɗ oxe.

⁴Fat o layin ee: ‹Fat o laaw of a dal, ba o saɗar dara, too ba o ñak njambaar yaam fuux le Resin, o Aa-araam oxe fo o ƥeenqe Remaliya, ndefna xa tukit xa ƭaq axaa na suunaa doŋ.

⁵Andaam ee Aa-araam we paaxeer a yuuɓanong, den fo Ee-efrayim we fo o ƥeenqe Remaliya fee o maad den. Kaa da lay ee:

⁶Fat i songik a Yudaa, ndiidlandin, mbokatin na qoox in soo ndalnanin o ƥeenqe Tabel nen o maad.

⁷Kaa koy, keeke o Yaal oxe na refkaa boo faw a layu: Kaaga waagooxkee too jegkee muk.

⁸Teeru fee Damaas, Araam soom a waxooxu, soo Resin a ref kelfa Damaas rek. Ndeer mene fo xa kiid qarɓeen ɓetuu fa leng fo xa kiid xa ƥetaq, Efrayim xan a tasel boo refkatee xeet.

⁹Teeru fee Samari, Efrayim soom a waxooxu, soo o ƥeenqe Remaliya a ref kelfa Samari rek. Nu ngimangee, nu mbaagkee saƭik.› »

¹⁰O Yaal oxe a dakooxa o lulit me Ahas ee:

¹¹«Xeɗi o Yaal oxe Roog of ta ci’ong o anddiloor olaa inoorna jaaniif mbaat na asamaan.»

¹²Ahas a doona yee: «Ha’aa, xeɗkiim dara, ɗeetlooxkiim o Yaal oxe.»

¹³Maaga, Esayi a layaan ee: «Nuun mbind Dawid, nan-gilooxyo boog. Ndax ke nu mboosɗandaa wiin we deyee dey a nuun boo nu mbug o mboosɗandahin a Roog es?

¹⁴Ten taxu o Yaal oxe fa xoox um xan a ci a nuun o anddiloor. Xan o toog oxaa andeerna adna a ref fo fud, too xan a ñoot o ƥiy o ngoor onqaa ta ne’kaa Imanu’el tekitna Roog oxey fa in.

¹⁵Xan a ñoowtaa fo sis fo suum boo yaa ta waagkaa o fañ ke faaxeerna soo a jil ke faaxna.

¹⁶Kaa koy, boo o njaaƈ onqe a helko fo waagaa fañ paaxeer soo a jil ke faaxna, xan xa cegel axe no maad ɗik weene na ndiidlandang a mbes a pec.»

¹⁷O Yaal oxe xan a hebliid took of fo took xeet of fo took mbind faap of ñaal kaa moseerna o njeg no kaa xotitna na bes faa Efrayim a xaajoorna fa Yudaa. Xan a hebliid o maad oxe Asuur ta dal took of.

¹⁸Na pe akaaga, xan o Yaal oxe a wuuƴ buƈ ke ndefna no cat ke no xuluɓ ole Niil fo quuraand ke ndefna no saax laa Asuur,

¹⁹da ngar a ñipoox muu refna na ƈufnand a kasooxu ke fo na baaƥ ake na xa coong axe fo no kol ke fo na xa suufand axe fop.

²⁰Na pe akaaga, xan o Yaal oxe a luɓit o nduus kaltaa o xuluɓ olaa Ofrat, a ruustin a qoox ake nuun fo a biil ake no cer nuun fop bo no raatam ole sax. O nduus onqeene refu o maad oxe Asuur.

²¹Na pe akaaga, oxuu refna xan a jeg fi leng soom fo pambe ƭik mbaat paal ƭik.

²²Kaa koy, xan fo sis ole a naag gañ boo fo neew a ñaamateel. A woora yee, oxuu yoqna kam saax le fo sis fo suum a bugko ñoowtaa.

²³Na pe akaaga, a ƭing aluu jegna taxar biiñ juni kaa mbaagna o njar xa monjong juni xaaliis fa nqoolu, xan a saxik takar-ñiig fo tomb.

²⁴A kas fo a qali na mbugko ndokteel teen, yaam takar-ñiig fo tomb rek na ndefkataa no saax le fop.

²⁵Xa coong axe nqooxtoogeena o koŋko fop koy, ndokkataand yaam takar-ñiig ke fo tomb ke. Xan qoox ke a nqaƴel teen, soo paal ke a nduutin.»