Read NQAARIIT NE ROOG Esayi 8 Bible Online

Esayi 8 - NQAARIIT NE ROOG bible

Esayi 8

¹O Yaal oxe a layaxam ee: «Jangi a alfa maak, o bind took fee a pind a qoolu yee: ‹Maheer saalaal haas bas› tekitna ‹Caɓe ke, ñofandooxi, yaq fee a matiida›.

²Xoti nen seede wooru a Uriya fee o saasadax oxe fa Sakari fee o ƥiy Yeberekiyaahu.»

³Cinj kaaga, wondooxaam fo o tew oxe mi refna o tuleer Roog, ta rok fo fud soo a ñoot o ƥiy o ngoor. O Yaal oxe a layaxam ee: «Fat o ne’in Maheer-Saalaal-Haas-Bas,

⁴yaam boo o njaaƈ onqe a helko fo waagaa lay ‹baa› mbaat ‹yaa›, xan kalal ke Damaas fo ke Samari a jegna a ƥisel mbaambir no maad oxe Asuur.»

⁵O Yaal oxe a layahinaxam ee:

⁶«Feek xeet fene kaa nqeef poofi ke Silowe[7] na nqayaa o ndang, soo a sendaa mbaambir Resin fo o ƥeenqe Remaliya,

⁷xan o Yaal oxe a ɓakandiid took den poofi cegu doole ke no xuluɓ o maak ole, ndefna o maad oxe Asuur fa doole fee no katil um fop. O xuluɓ ole xan a mayin boo a luƈit, a bal muu refna.

⁸Xan a fadik Yudaa, a fi o jaɓ, a maƥ fop. Xan a gar o kiin no cok, too poofi ke ten xan a ƭaayoox boo a muur saax le wo fop, wo Imanu’el[8].»

⁹Nuun qeet ke, nu mbug oo njibnaa xa buuq xire, ndaa xan nu ndiid boo sendaa. Nuun we ngenna no cat adna, nan-gilooxyo! Nu mbug oo njagandooxan a ñoq ale, ndaa xan nu ndiid boo sendaa. Kaam ee nu mbug oo njagandooxan a ñoq ale, ndaa xan nu ndiid boo sendaa.

¹⁰Nu mbaaga o yuuɓ kuu nu mbugna, ndaa kasaara doŋ a refkaa. Nu mbaaga o ngukir kuu refeerna, ndaa yaq a ƥay o don a refkaa, yaam Roog oxey fa in.

¹¹O Yaal oxe a pokaxam, a maƭooxaam, ndax xotkiim a ƭat ale na xeet feene. Keeke refu ke ta layaxama:

¹²«Ba nu nqoy yuuƥ paaxeer ke wiin weene a nqoyaa yuuƥ paaxeer. Ba nu saɗar ke da saɗaraa, too ba nu mbitin.

¹³O Yaal oxe Hupna fop nu mbaru o tedland. O ten soom nu mbaru o saɗar, too ten nu mbaru o mbit itam.»

¹⁴Xan a ref ngenand tedu, ndaa xan a ref itam ɓil laa na tolofnooraa fo ɓil maak laa na fanqaa maat ƭik ke Isra’el, a ref mbaal fo mbog no we ngenna Yeerusaleem.

¹⁵Xan wiin mayu a tolofit teen, a yen soo a mbeñexu. Xan a yen no mbog ne, too xan a ndamel.

¹⁶Humni o laxas seede leene, geekin, soo wegit a cangin aleene o ñaasir a ndeer daalbe es.

¹⁷Kaam cungaa o Yaal oxe na ɗasnaa mbind Yakoob mukit um. No ten doonum a koolax es.

¹⁸Mi fo xa teɓandoong axe o Yaal oxe a cooxaxama, xan i ndef kam Isra’el xa anddiloor fo comlaand no Yaal oxe Hupna fop, genna took o joong ole Siyoŋ.

¹⁹Xan nu nan ta layel ee: «Ƈufginooxyo xon we, nga’ir fo ɗeet we na nde’ooxaa soo a asooxaa.» Mee ndax xeet fee Roog um a waru o ƴufginoox! Xar taxu boog o ñoow a ƴufginooxaneel o qon?

²⁰«Na cangin ale no Yaal oxe fo no seede ne ten a nomtax a helu.» A layangee neene, nga’kee mbeet ne.

²¹Xan a mbidaa saax le fo xij fo nqeex. Xan a mbuux, yaam a nqeexel, a saloox o maad den fa Roog den. Xan a ngeleeroox farna fa asamaan,

²²cinj kaaga, da ƭeet a lanq, ndaa nga’kee lakas, a refangee naqad fo o niɓaan fo coono. Xan a ref na den o yeng olaa niɓaanna tit.

²³Kaa koy, o niɓaan ole maadooxkee kili me naqad fee a refna ndiiki. No camaane ke mbaafna, o Yaal oxe a neewand’a o jegel ole Sabulon fo ole Neftali, ndaa na pe ake na ngaraa, xan a ɓoxot o ndam a ƭat ale joonna fo o maag olaa fo o jegel ole kaltaa Yordaan fa Galile, o jegel ole no wiin jan we.